കോട്ടയം: വൈദ്യുതി സംബന്ധമായ പരാതികള് അറിയിക്കാന് വിളിക്കുന്ന ഉപഭോക്താക്കളോട് ഇനിമുതല് മാന്യമായ രീതിയില് പെരുമാറണമെന്ന് കെഎസ്ഇബി. ഫോണ് വിളിക്കുന്നവരെ സാര് എന്നോ മാഡം എന്നോ അതുമല്ലെങ്കില് മറ്റ് യോജ്യമായ ഭാഷയില് സംബോധന ചെയ്യണമെന്ന് ഓഫീസ് മേധാവികളോട് കെഎസ്ഇബി നിര്ദേശിച്ചു.
ജീവനക്കാരല്ല മറിച്ച് ഉപഭോക്താക്കളാണ് രാജാവെന്ന് വൈദ്യുതി ബോര്ഡ് ഓര്മ്മിപ്പിച്ചു. സ്ഥാപനത്തിന്റെ നിലനില്പ്പിന് പിന്നില് ഉപഭോക്താക്കളാണെന്നും അതിനാല് ആരാണോ ഫോണ് എടുക്കുന്നത് അവര് ഉപഭോക്താക്കളുടെ പരാതികള് ക്ഷമയോടെ കേട്ട് മറുപടി പറയണമെന്ന് എല്ലാ ഓഫീസ് മേധാവികള്ക്കും നിര്ദേശം നല്കി.
പരാതി പറയാന് വിളിച്ചാല് രണ്ടാമത്തെ ബെല്ലില് തന്നെ ഫോണെടുത്തിരിക്കണമെന്നും പരാതി കേള്ക്കുന്നതിനു മുമ്പ് നമസ്തേ എന്നോ ഗുഡ് മോര്ണിങ്, ഗുഡ് ഈവനിങ് എന്നോ പറയണമെന്നും അറിയിച്ചു. ഡ്യൂട്ടിയിലുള്ള ജീവനക്കാര് നിര്ബന്ധമായും തിരിച്ചറിയല് കാര്ഡ് ധരിക്കണം. വൈദ്യുതി തടസം സംബന്ധിച്ച് പരാതി കിട്ടിയാല് രജിസ്റ്റര് ചെയ്ത് പരാതിക്കാരന് സന്ദേശം കൈമാറാം.
കണ്സ്യൂമര് നമ്പര് ഇല്ലാത്ത പരാതികള് പരാതിക്കാരന്റെ പേര്, സെക്ഷന്, മൊബൈല് നമ്പര് എന്നിവ ചേര്ത്ത് രജിസ്റ്റര് ചെയ്യാം. പ്രശ്ന പരിഹാരത്തിന് വിവരം ചുമതലക്കാര്ക്ക് കൈമാറണം. പ്രശ്നം പരിഹരിച്ചാല് അത് ഉപഭോക്താക്കളെ അറിയിക്കണം. ജീവനക്കാരുടെ സേവനത്തില് ഉപഭോക്താക്കള് സംതൃപ്തിയും സഹകരണവും ഉറപ്പാക്കിയാല് മാത്രമേ വൈദ്യുതി വിതരണ കമ്പനിയെന്ന നിലയില് മുന്നോട്ട് പോകാനാകുവെന്നും കെഎസ്ഇബി ഓര്മ്മിപ്പിക്കുന്നു.