ചെന്നൈ: തമിഴ്നാട്ടിലെ വിരുദുനഗര് ജില്ലയില് പടക്ക നിര്മാണ ശാലയിലുണ്ടായ സ്ഫോടനത്തില് നാലുപേര് മരിച്ചു. എട്ടുവയസുള്ള ഒരു കുട്ടി അടക്കം എട്ടുപേര്ക്ക് അപകടത്തില് പരിക്കേറ്റു. എസ്. കുമാര് (38), പി. പെരിയസ്വാമി (40), എസ്. വീരകുമാര് (40), പി. മുരുഗേശന് (38) എന്നിവരാണ് മരിച്ചത്.
ശ്രീവല്ലിപുത്തുരിലെ ആര്.കെ.വി.എം. പടക്കനിര്മാണ ശാലയില് ശനിയാഴ്ച രാവിലെ 8.30 ഓടെയാണ് സ്ഫോടനമുണ്ടായത്. മൂന്ന് പേര് സംഭവ സ്ഥലത്തുവെച്ചും ഒരാള് ആശുപത്രിയില്വെച്ചുമാണ് മരണത്തിന് കീഴടങ്ങിയത്. കുമാര്, പെരിയസ്വാമി, വീരകുമാര് എന്നിവര് സംഭവ സ്ഥലത്തുവെച്ചും മുരുഗേശന് ശിവകാശി ജില്ലാ ആശുപത്രിയില്വെച്ചുമാണ് മരിച്ചത്.
പരിക്കേറ്റവരില് ഒരാളുടെ നില ഗുരുതരമായി തുടരുകയാണ്. പരിക്കേറ്റവര് ശിവകാശി ജില്ലാ ആശുപത്രിയില് ചികിത്സയിലാണ്. ഫയര്ഫോഴ്സും പോലീസും റവന്യൂ ഉദ്യോഗസ്ഥരും സ്ഥലത്തെത്തിയിട്ടുണ്ട്. പുതുവര്ഷത്തെ വരവേല്ക്കാന് പൂജ നടത്താനായാണ് ജോലിക്കാര് പടക്ക നിര്മാണ യൂണിറ്റിലെത്തിയതെന്ന് പോലീസ് പറഞ്ഞു. അപകടത്തില് പരിക്കേറ്റ തൊഴിലാളികളിലൊരാളായ ഗോപാലകൃഷ്ണന് പൂജക്കായി മകനേയും ഒപ്പം കൂട്ടിയിരുന്നു.