ഭോപ്പാല്: മൂന്നു വയസ്സുകാരിയെ മൃഗീയമായി പീഡിപ്പിച്ച പത്തൊന്മ്പതുകാരന് വധശിക്ഷ. മധ്യപ്രദേശിലെ പ്രാദേശിക കോടതിയാണ് യുവാവിന് നിയമം അനുശാസിക്കുന്ന ഏറ്റവും വലിയ ശിക്ഷ നല്കിയത്. ഛത്തര്പുര് അഡീഷണല് സെഷന്സ് ജഡ്ജി നൗറീന് നിഗം ആണ് പ്രതിയായ തൗഹീദ് മുസല്മാനെ (19) വധശിക്ഷയ്ക്ക് വിധിച്ച് തിങ്കളാഴ്ച ഉത്തരവിറക്കിയത്.
തൗഹീദിനെതിരെ 376 (എ)(ബി) കുറ്റം തെളിഞ്ഞതോടെയാണ് കഴിഞ്ഞ ദിവസം പാര്ലമെന്റ് പാസാക്കിയ ക്രിമിനല് ലോ ഭേദഗതി ഓര്ഡിനന്സ് 2018 പ്രകാരമുള്ള ശിക്ഷ വിധിച്ചത്. ഇക്കഴിഞ്ഞ ഏപ്രില് 24നാണ് തൗഹീന് കുട്ടിയെ പീഡിപ്പിച്ചത്. കുട്ടിയുടെ അമ്മ വീടിനു പുറത്തുപോയ സമയത്താണ് വീട്ടില് അതിക്രമിച്ചുകയറി ഇയാള് പീഡിപ്പിച്ചത്. അമ്മ തിരിച്ചെത്തുമ്പോള് രക്തത്തില് കുളിച്ചുകിടക്കുന്ന കുഞ്ഞിനെയാണ് കണ്ടത്. വീട്ടില് നിന്നും ഇറങ്ങിയോടിയ തൗഹീദിനെ നാട്ടുകാര് പിടികൂടി രാജ്നഗര് പോലീസിന് കൈമാറുകയായിരുന്നു.