ചണ്ടീഗഢ്: പരിശീലനത്തിനിടെ പഞ്ചാബില് വ്യോമസേന വിമാനം തകര്ന്നു വീണു. സംഭവത്തില് ഒരു വ്യോമസേന പൈലറ്റ് മരിച്ചു. ഒപ്പമുണ്ടായിരുന്ന എന്സിസി കേഡറ്റിന് പരിക്കേറ്റു. എന്സിസി കേഡറ്റുകളെ വിമാനം പറത്താന് പരിശീലിപ്പിക്കുന്നതിനിടെയാണ് സംഭവം.
ജിഎസ് ചീമ എന്ന പൈലറ്റാണ് മരിച്ചത്. വ്യോമസേനയിലെ വിങ് കമാന്ഡര് ആയിരുന്ന ചീമയെ എന്സിസി കേഡറ്റുകളെ പരിശീലിപ്പിക്കുന്നതിനായി ഡെപ്യൂട്ടേഷനില് അയച്ചിരിക്കുകയായിരുന്നു
വിപിന് കുമാര് യാദവ് എന്ന എന്സിസി കേഡറ്റിനാണ് പരിക്കേറ്റത്. ഗവണ്മെന്റ് മോഹിന്ദ്ര കോളേജിലെ വിദ്യാര്ത്ഥിയാണ് വിപിന്. പഞ്ച്കുളയിലെ ചണ്ടിമന്ദിറില് സ്ഥിതി ചെയ്യുന്ന കമാന്ഡ് ആശുപത്രിയിലേക്ക് വിപിനെ മാറ്റി.
പട്യാല ഏവിയേഷന് ക്ലബ്ബിന്റെ ഉടമസ്ഥതയിലുള്ള സിംഗിള് എന്ജിന്- ടു സീറ്റര് വിമാനമാണ് സംഗൂര്-പട്യാല റോഡിനു സമീപത്ത് തകര്ന്നുവീണത്. സംഭവത്തില് അന്വേഷണത്തിന് ഉത്തരവിട്ടിട്ടുണ്ടെന്ന് വ്യോമസേന വൃത്തങ്ങള് അറിയിച്ചു.