ന്യൂഡല്ഹി: ഭാര്യമാരെ ഇന്ത്യയിലുപേക്ഷിച്ചു കടന്ന പ്രവാസി പുരുഷന്മാരുടെ പാസ്പോര്ട്ടുകള് റദ്ദാക്കിയെന്ന് വനിതാ ശിശുവികസന വകുപ്പുമന്ത്രി മനേകാ ഗാന്ധി അറിയിച്ചു. നാല്പ്പത്തഞ്ചോളം പേരുടെ പാസ്പോര്ട്ടുകളാണ് റദ്ദാക്കിയത്. ഇവര്ക്കു വേണ്ടി ലുക്ക് ഔട്ട് നോട്ടീസ് പുറപ്പെടുവിച്ചെന്നും മന്ത്രി കൂട്ടിച്ചേര്ത്തു.
എന്ആര്ഐ ഭര്ത്താക്കന്മാര് ഭാര്യമാരെ ഉപേക്ഷിച്ചു കടന്നുകളയുന്നതിനെ കുറിച്ച് അന്വേഷിക്കാനായി ഇന്റഗ്രേറ്റഡ് നോഡല് ഏജന്സി രൂപവത്കരിച്ചിരുന്നു. ഈ ഏജന്സിയാണ് ഭാര്യമാരെ ഉപേക്ഷിച്ചു കടന്ന എന്ആര്ഐ ഭര്ത്താക്കന്മാര്ക്കു വേണ്ടി ലുക്ക് ഔട്ട് നോട്ടീസ് പുറപ്പെടുവിച്ചത്.വനിതാ ശിശുവികസന വകുപ്പു സെക്രട്ടറി രാകേഷ് ശ്രീവാസ്തവയാണ് ഇന്റഗ്രേറ്റഡ് നോഡല് ഏജന്സിയുടെ അധ്യക്ഷന്.
വിദേശകാര്യമന്ത്രാലയം, വനിതാ ശിശുവികസന മന്ത്രാലയം, ആഭ്യന്തര മന്ത്രാലയം, നിയമ നീതി മന്ത്രാലയം എന്നിവര് ചേര്ന്ന് എന്ആര്ഐ ഭര്ത്താക്കന്മാര് ഉപേക്ഷിച്ചു പോകുന്ന സ്ത്രീകള്ക്കു നീതി ലഭ്യമാക്കുകയെന്ന ഉദ്ദേശ്യത്തോടെ ബില് കൊണ്ടുവന്നിരുന്നു. ഈ ബില് രാജ്യസഭയില് അവതരിപ്പിച്ചതായും മനേക പറഞ്ഞു. എന്നാല് ബില് രാജ്യസഭ പാസാക്കിയിട്ടില്ല.