ന്യൂഡല്ഹി: കേന്ദ്രസര്ക്കാര് ചരക്കു സേവന നികുതി വെട്ടിക്കുറയ്ക്കാനൊരുങ്ങുന്നു. മിക്ക ഉത്പന്നങ്ങളുടെയും നികുതി 18 ശതമാനത്തിന് താഴെ എത്തിക്കുക എന്ന ലക്ഷ്യവുമായാണ് കേന്ദ്രം നികുതി നിരക്ക് കുറയ്ക്കാനൊരുങ്ങുന്നത്. ശനിയാഴ്ച നടക്കുന്ന ജിഎസ്ടി കൗണ്സിലില് തീരുമാനം പ്രഖ്യാപിക്കുമെന്നാണ് കേന്ദ്രസര്ക്കാര് വൃത്തങ്ങള് പറയുന്നത്.
നിലവില് പല ഉത്പന്നങ്ങളുടെയും നികുതി 28ശതമാനമാണ്. ഇത് 18 ശതമാനമോ അതില് താഴെയോ ആക്കാനാണ് കേന്ദ്രസര്ക്കാര് ശ്രമിക്കുന്നത്. എസി, റഫ്രിജറേറ്റര്, വാഷിങ് മെഷീന്, ഡിജിറ്റല് ക്യാമറ, വീഡിയോ ഗെയിം, വാട്ടര് ഹീറ്റര്, പെയിന്റുകള്, പെര്ഫ്യൂമുകള്, ട്രാക്ടറുകള്, വാഹനങ്ങളുടെ ഘടകങ്ങള്, വാക്വം ക്ലീനറുകള്, ഹെയര് ക്ലിപ്പുകള്, ഷേവറുകള്, സിമന്റ്, പുട്ടി, വാര്ണിഷ്, മാര്ബിള് തുടങ്ങിയവയ്ക്കും വിലകുറയുമെന്നാണ് വിവരം.
ആഡംബര വാഹനങ്ങള്, ഉല്ലാസ നൗകകള്, സ്വകാര്യ വിമാനങ്ങള്, സിഗരറ്റ്, പാന്മസാല, പുകയില ഉത്പന്നങ്ങള്, സോഫ്റ്റ് ഡ്രിങ്ക്സ് എന്നിവയ്ക്ക് നിലവിലുള്ള 28 ശതമാനം തുടരും. 99 ശതമാനം വസ്തുക്കളുടെയും നികുതി നിരക്ക് പരമാവധി 18 ശതമാനത്തില് പരിമിതപ്പെടുത്താനാണ് സര്ക്കാര് ശ്രമിക്കുന്നതെന്ന് പ്രധാനമന്ത്രി നരേന്ദ്രമോഡി ചൊവ്വാഴ്ച വ്യക്തമാക്കിയിരുന്നു. ഇതോടെ നികുതി കുറയുമെന്ന സൂചനകള് പുറത്ത് വന്നിരുന്നു.