മുംബൈ: നിരന്തരമായി ഉണ്ടാവുന്ന കാലാവസ്ഥാ വ്യതിയാനം ഭീഷണിയായി മാറിക്കൊണ്ടിരിക്കുകയാണ്. ഉഷ്ണക്കാറ്റുകളെക്കുറിച്ചുള്ള മുന്നറിയിപ്പാണ് രാജ്യം പുതുതായി നേരിടുന്ന വെല്ലുവിളി. വ്യാവസായിക വിപ്ലവത്തിന് മുന്പുളള അന്തരീക്ഷ ഊഷ്മാവിനേക്കാള് താപം രണ്ടു ഡിഗ്രി സെല്ഷ്യസ് ഉയര്ന്നാല് രാജ്യം കൊടും ചൂടിനെ നേരിടേണ്ടിവരുമെന്ന് റിപ്പോര്ട്ടില് പറയുന്നു.
2015ല് കൊടും ചൂടില് ഇന്ത്യയില് 2500 പേര്ക്കാണ് ജീവന് നഷ്ടമായതെന്ന് ഔദ്യോഗിക കണക്കുകള് വ്യക്തമാക്കുന്നു. ആഗോള താപനം മനുഷ്യന്റെ ആരോഗ്യത്തെയും ബാധിക്കും. ദശലക്ഷക്കണക്കിനു പേര്ക്കു ജീവന് നഷ്ടമാകാനും ഇത് കാരണമാകുമെന്ന് റിപ്പോര്ട്ട് ചൂണ്ടിക്കാണിക്കുന്നു. വാഷിംഗ്ടണ് സര്വകലാശാല, ലോകാരോഗ്യ സംഘടന, ക്ലൈമറ്റ് ട്രാക്കര് എന്നിവയില്നിന്നുള്ള വിദഗ്ധ സംഘമാണ് റിപ്പോര്ട്ട് തയ്യാറാക്കിയിരിക്കുന്നത്. കാലാവസ്ഥാ വ്യതിയാനത്തെ തുടര്ന്നു ഭക്ഷ്യ ക്ഷാമം, ജീവിത സാഹചര്യങ്ങളുടെ ദൗര്ലഭ്യം, ആരോഗ്യ പ്രശ്നങ്ങള് എന്നിവ കാരണം ദാരിദ്ര്യവും പല മടങ്ങു കൂടും.
ഐപിസിസിയുടെ പഠനം പ്രകാരം ആഗോള താപനത്തോടൊപ്പം തന്നെ ദാരിദ്ര്യവും വര്ധിക്കും. ആഗോള താപനം രണ്ടു ഡിഗ്രിയില്നിന്ന് 1.5 ഡിഗ്രി സെല്ഷ്യസായി കുറയ്ക്കുന്നതിലൂടെ കാലാവസ്ഥ പ്രശ്നങ്ങളിലും ദാരിദ്ര്യത്തിലും അകപ്പെടുന്നവരുടെ വ്യാപ്തി കുറയ്ക്കാനാകുമെന്നാണു പഠനങ്ങള് വിരല് ചൂണ്ടുന്നു. ഇന്ത്യയില് ആണവോര്ജ മേഖലയില്നിന്നുമാത്രം കഴിഞ്ഞ സാമ്പത്തിക വര്ഷം പുറന്തള്ളിയത് 929 ദശലക്ഷം ടണ് കാര്ബണ് ഡയോക്സൈഡാണ്.
ഡിസംബറില് പോളണ്ടില് നടക്കുന്ന കാലാവസ്ഥാ വ്യതിയാന ഉച്ചകോടിയില് ഈ വിഷയവും ചര്ച്ച ചെയ്യും. ഏറ്റവും കൂടുതല് കാര്ബണ് പുറന്തള്ളുന്ന രാജ്യങ്ങളിലൊന്നായ ഇന്ത്യയുടെ നിലപാട് ഉച്ചകോടിയില് നിര്ണായകമാകും. 2030നും 2052നും ഇടയിലുളള കാലഘട്ടത്തില് ആഗോള താപനത്തില് 1.5 ഡിഗ്രി സെല്ഷ്യസിന്റെ വര്ധന രേഖപ്പെടുത്തും.