കോഴിക്കോട്: ജീപ്പോടിക്കുന്നതിനിടെ നെഞ്ചുവേദന വന്നു കുഴഞ്ഞു വീണ യുവാവിന് രക്ഷകയായെത്തി നടി സുരഭി ലക്ഷ്മി. രാത്രിയില് വഴിതെറ്റി നഗരത്തില് കുടുങ്ങിപ്പോയ ഭാര്യയെയും കുഞ്ഞിനെയും അന്വേഷിച്ചിറങ്ങിയപ്പോഴായിരുന്നു യുവാവ് കുഴഞ്ഞുവീണത്. അതുവഴി വാഹനത്തിലെത്തിയപ്പോഴായിരുന്നു സുരഭി യുവാവിനെ കണ്ടത്.
കൂടെയുണ്ടായിരുന്ന ഇളയ കുഞ്ഞിനൊപ്പം യുവാവ് സഹായത്തിനു കേഴുന്നതിനിടെ അതുവഴി വാഹനത്തിലെത്തിയ സുരഭിലക്ഷ്മി ഉടന് പൊലീസില് വിവരം അറിയിക്കുകയായിരുന്നു. തുടര്ന്ന് സ്ഥലത്തെത്തിയ പോലീസ് യുവാവിനെ സമയത്ത് ആശുപത്രിയിലെത്തിച്ച രക്ഷയായി.
കാണാതായ ഭാര്യയെയും കുഞ്ഞിനെയും ആശുപത്രിക്കു സമീപത്തെ പൊലീസ് സ്റ്റേഷനില് സുരക്ഷിതരായി കണ്ടെത്തുകയും ചെയ്തു. ചൊവ്വ രാത്രിയാണു സംഭവം. മെഡിക്കല് കോളജ് പൊലീസ് സ്റ്റേഷന് പരിധിയിലെ വീട്ടില് നിന്നു രാവിലെയാണു മനോദൗര്ബല്യമുള്ള യുവതി കുഞ്ഞിനെയും കൊണ്ടു പുറത്തു പോയത്.
ഏറെ സമയം കഴിഞ്ഞിട്ടും കാണാതായതിനെ തുടര്ന്നു ഭര്ത്താവ് പകലന്തിയോളം നഗരത്തിലുടനീളം തിരഞ്ഞെങ്കിലും കണ്ടെത്താനായില്ല. ഇരുട്ടിയതോടെ പൊലീസില് പരാതി നല്കിയ ശേഷം വീട്ടിലേക്കു മടങ്ങി. ഇതേ സമയത്താണ് നടന്നു തളര്ന്ന നിലയില് യുവതിയും കുഞ്ഞും മെഡിക്കല് കോളജ് പൊലീസ് സ്റ്റേഷനിലെത്തിയത്.
also read: ഉച്ചയ്ക്ക് ശേഷം ഇടിമിന്നലോടു കൂടിയ കനത്ത മഴ, 60 കിലോമീറ്റര് വേഗത്തില് കാറ്റിന് സാധ്യത
പൊലീസുകാര് അമ്മയ്ക്കും കുഞ്ഞിനും ഭക്ഷണം നല്കിയ ശേഷം സ്റ്റേഷനില് സുരക്ഷിതരായി ഇരുത്തി. യുവതിയുടെ കയ്യില് നിന്നു ഭര്ത്താവിന്റെ നമ്പര് വാങ്ങി ഫോണില് വിളിച്ചു കാര്യം പറഞ്ഞെങ്കിലും സംസാരം തീരുന്നതിനുള്ളില് ഭര്ത്താവിന്റെ ഫോണ് ചാര്ജ് തീര്ന്ന് ഓഫായി.
രണ്ടു കൂട്ടുകാരെയും ഇളയ കുഞ്ഞിനെയും കൂട്ടി ഭര്ത്താവ് ഉടന് പൊലീസ് സ്റ്റേഷനിലേക്കു ജീപ്പില് പുറപ്പെട്ടെങ്കിലും വഴിയില്വച്ച് കലശലായ നെഞ്ചുവേദന അനുഭവപ്പെട്ടു വാഹനത്തില് കുഴഞ്ഞു വീഴുകയായിരുന്നു. ഡ്രൈവിങ് വശമില്ലാത്ത കൂട്ടുകാര് പുറത്തിറങ്ങി നിന്നു വാഹനങ്ങള്ക്കു കൈകാണിച്ചെങ്കിലും ആരും നിര്ത്തിയില്ല.
നഗരത്തിലെ ഒരു ഇഫ്ത്താറില് പങ്കെടുത്ത് വീട്ടിലേക്കു കാറോടിച്ചു മടങ്ങുകയായിരുന്ന നടി സുരഭിലക്ഷ്മി ഇവരെക്കണ്ട് വാഹനം നിര്ത്തുകയും ജീപ്പിനുള്ളില് അവശനിലയില് കിടക്കുന്ന യുവാവിനെക്കണ്ട് വിവരം പൊലീസ് കണ്ട്രോള് റൂമില് അറിയിക്കുകയുമായിരുന്നു.
പൊലീസെത്തി യുവാവിനെ മെഡിക്കല് കോളജ് ആശുപത്രിയിലേക്കു കൊണ്ടു പോയപ്പോള് സുരഭിയും കൂടെപ്പോയി. യുവാവിനെ ആശുപത്രിയിലാക്കിയ ശേഷം കുഞ്ഞിനെയും കൂട്ടി സുരഭി പൊലീസ് സ്റ്റേഷനിലെത്തുകയും ചെയ്തു. ഇതിനിടയില്, സുരഭിയോടൊപ്പം വന്ന കുഞ്ഞിനെ സ്റ്റേഷനിലുണ്ടായിരുന്ന അമ്മ തിരിച്ചറിയുകയായിരുന്നു.