കോഴിക്കോട്; കോഴിക്കോട് വിവാഹദിവസം രാവിലെ വധുവിനെ ജീവനൊടുക്കിയ നിലയില് കണ്ടെത്തി. കാളാണ്ടിത്താഴം നങ്ങോലത്ത് സുരേഷ് ബാബുവിന്റെ മകള് മേഘയാണ് മരിച്ചത്. മുപ്പത് വയസ്സായിരുന്നു. മുറിയില് തൂങ്ങിമരിച്ച നിലയിലാണ് മേഘയെ കണ്ടെത്തിയത്. ആത്മഹത്യക്കുറിപ്പ് പൊലീസ് കണ്ടെടുത്തു.
കുളിച്ചു വരാമെന്ന് പറഞ്ഞ് മുറിയില് കയറിയതായിരുന്നു മേഘ. പിന്നീട് മരിച്ച നിലയില് കണ്ടെത്തുകയായിരുന്നു. വധൂഗൃഹത്തിലാണു വിവാഹം നടത്താനിരുന്നത്. അതിനായി മണ്ഡപം ഉള്പ്പെടെ ഒരുക്കി. രാവിലെ ബ്യൂട്ടീഷ്യനെത്തിയപ്പോള്, കുളിച്ചു വരാമെന്നു പറഞ്ഞ് മേഘ കിടപ്പുമുറിയില് കയറി വാതില് അടയ്ക്കുകയായിരുന്നു.
കുറേ നേരം കഴിഞ്ഞിട്ടും മേഘ വാതില് തുറക്കാത്തതിനാല് ശുചിമുറിയിലെ ചില്ല് പൊട്ടിച്ചു നോക്കിയെങ്കിലും കാണാന് കഴിഞ്ഞില്ല. തുടര്ന്നു കിടപ്പുമുറിയിലെ ജനല്ചില്ല് തകര്ത്തു നോക്കിയപ്പോഴാണ് ഫാനില് തൂങ്ങിക്കിടക്കുന്ന നിലയില് കണ്ടത്.
സ്വകാര്യ ആശുപത്രിയില് നഴ്സിങ് വിദ്യാര്ഥിനിയായ മേഘയുടെ വിവാഹം അതേ ആശുപത്രിയിലെ സ്റ്റാഫ് നഴ്സുമായി ഇന്നലെ നടത്താന് ഒരുക്കങ്ങളെല്ലാം പൂര്ത്തിയായതായിരുന്നു. അസ്വാഭാവിക മരണത്തിനു ചേവായൂര് പൊലീസ് കേസെടുത്തു.