മലപ്പുറം: ആദ്യരാത്രി കഴിഞ്ഞ് ഭാര്യ വീട്ടില് നിന്നും മുങ്ങിയ യുവാവ് അറസ്റ്റില്. മലപ്പുറത്തെ വണ്ടൂരിലാണ് സംഭവം. കോണ്ടോട്ടി ചെറുകാവ് സ്വദേശി മണ്ണാറക്കല് കമറുദീനാണ് അറസ്റ്റിലായത്. പെരിന്തല്മണ്ണ കോടതിയില് ഹാജരാക്കിയ പ്രതിയെ പതിനാല് ദിവസത്തേക്ക് റിമാന്റ് ചെയ്തു.
ഒരു വര്ഷം മുമ്പാണ് കമറുദീന് വണ്ടൂര് കുറ്റിയില് സ്വദേശിയായ പെണ്കുട്ടിയെ വിവാഹം കഴിച്ചത്. വിവാഹ ദിവസം പെണ്കുട്ടിയുടെ വീട്ടില് താമസിച്ച കമറുദ്ദീന് രാവിലെ ഇവിടെ നിന്നും മുങ്ങുകയായിരുന്നു. പിന്നീട് വിവിധ സ്ഥലങ്ങളില് പെണ്കുട്ടിയുടെ കുടുംബം ഇയാളെ തിരഞ്ഞെങ്കിലും കണ്ടെത്താനായില്ല.
also read: സുരേഷ് റെയ്നയുടെ പിതാവ് ത്രിലോക്ചന്ദ് റെയ്ന അന്തരിച്ചു
അതിനിടെയാണ് കമറുദ്ദീന് നല്കിയ വിലാസവും ശരിയല്ലെന്ന് പെണ്കുട്ടിയുടെ ബന്ധുക്കള് മനസ്സിലാക്കിയത്. ഇതോടെ പെണ്കുട്ടിയുടെ കുടുംബം പൊലീസില് പരാതി നല്കുകയായിരുന്നു. പൊലീസ് നടത്തിയ അന്വേഷണത്തില് കൊണ്ടോട്ടിയില് നിന്നാണ് കമറുദ്ദീനെ കണ്ടെത്തിയത്.
അവിടെ മറ്റൊരു ഭാര്യക്കും മക്കള്ക്കുമൊപ്പം കഴിയുകയായിരുന്നു കമറുദ്ദീന്. ലൈംഗീക പീഡനമടക്കമുള്ള പരാതികളാണ് വണ്ടൂരിലെ പെണ്കുട്ടി കമറുദ്ദീനെതിരെ നല്കിയിട്ടുള്ളത്.