മാനന്തവാടി: വയനാട്ടില് ഗര്ഭിണിയായ യുവതി മരിച്ച സംഭവം കൊലപാതകമെന്ന് പൊലീസ്. മാനന്തവാടിയിലാണ് സംഭവം. എടവക മൂളിത്തോട് പള്ളിക്കല് ദേവസ്യയുടെയും മേരിയുടെയും മകളായ റിനിയാണ് മരിച്ചത്. റിമാന്ഡില് കഴിയുന്ന എടവക സ്വദേശി റഹീം വിഷം കലര്ത്തി നല്കിയ ജ്യൂസ് കഴിച്ചാണ് റിനി മരിച്ചതെന്ന് ശാസ്ത്രീയ പരിശോധനയില് വ്യക്തമായി.
2021 നവംബര് 20 നാണ് റിനി മരിച്ചത്. റിനിയുടെ അസ്വഭാവിക മരണത്തിന് പിന്നില് ഓട്ടോ ഡ്രൈവറായ റഹീമാണെന്ന് കുടുംബം പൊലീസില് പരാതി നല്കി. പിന്നീട് ഒളിവില് പോയ റഹീമിനെ തമിഴ്നാട് ഏര്വാടിയില് നിന്നാണ് മാനന്തവാടി പൊലീസ് കസ്റ്റഡിയിലെടുത്തത്.
മാനസിക വൈകല്യമുള്ള റിനിയെ വിഷം കലര്ത്തിയ ജ്യൂസ് നല്കിയാണ് റഹീം കൊന്നതെന്ന് ലാബ് റിപ്പോര്ട്ടില് തെളിഞ്ഞതായി പൊലീസ് അറിയിച്ചു. റിനി മരിക്കുമ്പോള് 5 മാസം ഗര്ഭിണിയായിരുന്നു. ഡിഎന്എ ടെസ്റ്റില് കുഞ്ഞിന്റെ പിതാവ് റഹീമാണെന്ന് വ്യക്തമായി.
മരിച്ച റിനിയുടെ കുടുംബവുമായി റഹീമിന് ഏറെ നാളത്തെ സൗഹൃദ ബന്ധമുണ്ടായിരുന്നു. മാനസിക വൈകല്യമുള്ള റിനിയേയും കുഞ്ഞിനേയും കൊന്നതിന് റഹീമിനെതിരെ കൂടുതല് വകുപ്പുകള് ചുമത്തി കുറ്റപ്പത്രം തയ്യാറാക്കുമെന്ന് പോലീസ് അറിയിച്ചു. മറ്റൊരു യുവതിയെ ബലാത്സംഗം ചെയ്യാന് ശ്രമിച്ചതിനും റഹീമിനെതിരെ കേസെടുത്തിരുന്നു.