തിരുവനന്തപുരം: കേരളത്തില് വീണ്ടും മഴ ശക്തമാകാന് സാധ്യതയെന്ന് മുന്നറിയിപ്പ്. ന്യൂനമര്ദ്ദത്തിന്റെ സ്വാധീനഫലമായി ഞായറാഴ്ച മുതല് കേരളത്തില് വീണ്ടും മഴ ശക്തിപ്രാപിക്കുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. ജവാദ് ചുഴലിക്കാറ്റ് ശനിയാഴ്ച രാവിലെ ആന്ധ്രാ, ഒഡീഷ തീരത്ത് കരയില് പ്രവേശിക്കുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്.
ജാഗ്രതയുടെ ഭാഗമായി കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, പാലക്കാട്, മലപ്പുറം എന്നി ജില്ലകളില് യെല്ലോ അലര്ട്ട് പ്രഖ്യാപിച്ചു. തിങ്കളാഴ്ചയും ഈ ജില്ലകളില് ജാഗ്രതാനിര്ദേശം നല്കിയിട്ടുണ്ട്. നിലവില് തെക്ക് കിഴക്കന് ബംഗാള് ഉള്ക്കടലിലും ആന്ഡമാന് കടലിലുമായി ശക്തി കൂടിയ ന്യുന മര്ദ്ദം സ്ഥിതി ചെയ്യുന്നുണ്ട്.
Also Read: മഴക്കെടുതിയിലായ ആന്ധ്രയ്ക്ക് സഹായ ഹസ്തവുമായി ചിരഞ്ജീവിയും രാംചരണും; നല്കിയത് 25 ലക്ഷം രൂപ വീതം
അടുത്ത 12 മണിക്കൂറിനുള്ളില് തെക്ക് കിഴക്കന് ബംഗാള് ഉള്ക്കടലിലെത്തി തീവ്ര ന്യുന മര്ദ്ദമായി മാറുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. തുടര്ന്നുള്ള 24 മണിക്കൂറില് വീണ്ടും ശക്തി പ്രാപിച്ച് മധ്യ ബംഗാള് ഉള്ക്കടലില് വച്ചു ‘ജവാദ് ‘ചുഴലിക്കാറ്റായി മാറാനും സാധ്യതയുണ്ട്.
തുടര്ന്ന് പടിഞ്ഞാറു വടക്ക് പടിഞ്ഞാറു ദിശയില് സഞ്ചരിച്ചു ശക്തി പ്രാപിക്കുന്ന ചുഴലിക്കാറ്റ് ഡിസംബര് 4 നു രാവിലെയോടെ വടക്കന് ആന്ധ്രാപ്രദേശ് ഒഡിഷ തീരത്ത് കരയില് പ്രവേശിക്കുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ പ്രവചനം.
മധ്യ കിഴക്കന് അറബിക്കടലില് ചക്രവാതചുഴി നിലനില്ക്കുന്നുണ്ട്. അറബിക്കടലിലെ ചക്രവാതചുഴിയും ബംഗാള് ഉള്ക്കടലില് രൂപപ്പെടാന് സാധ്യത യുള്ള ചുഴലിക്കാറ്റും നിലവില് കേരളത്തില് ഭീഷണിയില്ലെന്നും കാലാവസ്ഥ നിരീക്ഷണ കേന്ദ്രം അറിയിച്ചു.