ടെഹ്റാന്: അന്താരാഷ്ട്ര സമുദ്രനിയമം ലംഘിച്ചുവെന്നാരോപിച്ച് ഇറാന് പിടിച്ചെടുത്ത ബ്രിട്ടീഷ് എണ്ണക്കപ്പല് സ്റ്റെനാ ഇംപാറോയിലെ മലയാളി ജീവനക്കാരിലൊരാളായ എറണാകുളം കളമശ്ശേരി സ്വദേശി ഡിജോ പാപ്പച്ചന് കുടുംബവുമായി സംസാരിച്ചു. താന് സുരക്ഷിതനാണെന്നും ഭയപ്പെടേണ്ട സാഹചര്യമൊന്നുമില്ലെന്നും മകന് പറഞ്ഞതായി അച്ഛന് പാപ്പച്ചന് പറഞ്ഞു.
ഇന്നലെ രാത്രി 10 മണിയോടെയാണ് ഡിജോ ഫോണില് അച്ഛനോടും അമ്മയോടും സംസാരിച്ചത്. കപ്പലിലുള്ള മറ്റൊരു മലായാളി തൃപ്പൂണിത്തറ സ്വദേശി സിജു വി ഷേണായിയും കഴിഞ്ഞ ബുധനാഴ്ച കുടുംബവുമായി ബന്ധപ്പെട്ടിരുന്നു. മൂന്ന് മിനിറ്റോളം കുടുംബാംഗങ്ങളുമായി ഫോണില് സംസാരിച്ച സിജുവും ഭയപ്പെടേണ്ട സാഹചര്യമില്ലെന്നാണ് കുടുംബത്തെ അറിയിച്ചത്.
സിജുവിനെയും ഡിജോ പാപ്പച്ചനെയും കൂടാതെ പിജി സുനില്കുമാര്, പ്രജിത്ത് എന്നിവരാണ് കപ്പലിലുള്ള മറ്റ് രണ്ട് മലയാളികള്. കഴിഞ്ഞ വെള്ളിയാഴ്ചയാണ് സമുദ്ര നിയമം ലംഘിച്ചെന്നാരോപിച്ച് ബ്രിട്ടന്റെ എണ്ണക്കപ്പലായ സ്റ്റെനാ ഇംപറോ ഹോര്മൂസ് കടലിടുക്കില് വച്ച് ഇറാന് പിടിച്ചെടുത്തത്.
ഉപരോധം ലംഘിച്ച് സിറിയയിലേക്ക് എണ്ണ കടത്തുന്നു എന്നാരോപിച്ച് ഈ മാസം 4ന് ഗ്രേസ്-1 എന്ന ഇറാനിയന് എണ്ണക്കപ്പല് ബ്രിട്ടന് പിടിച്ചെടുത്തതിന് പ്രതികാരമായിട്ടായിരുന്നു ഇറാന്റെ നടപടി. ഇറാന്റെ കപ്പല് 30 ദിവസം തടങ്കലില് വെക്കാനണ് ജിബ്രാള്ട്ടര് സുപ്രീംകോടതി ഉത്തരവിട്ടത്.