കൊളംബോ: കൊളംബോ ഫോര്ട്ട് മജിസ്ട്രേറ്റ് കോടതി ശ്രീലങ്കന് പ്രസിഡന്റ് മൈത്രിപാല സിരിസേനയെ വധിക്കാന് ഗൂഢാലോചന നടത്തിയെന്നാരോപിച്ച് അറസ്റ്റുചെയ്ത ഇന്ത്യക്കാരനെ കുറ്റവിമുക്തനാക്കി. കോടതി വെറുതെവിട്ടത് കേരളത്തില്നിന്നുള്ള മാര്സലി തോമസിനെയാണ്.
മാര്സലി തോമസിനെ പോലീസ് അറസ്റ്റുചെയ്തത് പോലീസിന് രഹസ്യവിവരങ്ങള് നല്കുന്ന നമല് കുമാര എന്ന ശ്രീലങ്കന് പൗരന്റെ പരാതിയെത്തുടര്ന്നായിരുന്നു. പ്രസിഡന്റ് സിരിസേന, മുന് പ്രസിഡന്റ് മഹിന്ദ രാജപക്സെയുടെ സഹോദരനും പ്രതിരോധവകുപ്പിലെ മുന് ഉദ്യോഗസ്ഥനുമായ ഗോട്ഭയ രാജപക്സെ എന്നിവരെ വധിക്കാന് ഗൂഢാലോചന നടത്തിയെന്നായിരുന്നു കേസ്.
കോടതി ഫെബ്രുവരി 13ന് മാര്സലി തോമസിനെതിരേയുള്ള തെളിവുകള് രണ്ടാഴ്ചയ്ക്കകം ഹാജരാക്കാന് അന്വേഷണ ഉദ്യോഗസ്ഥരോട് ആവശ്യപ്പെട്ടിരുന്നു. എന്നാല്, വിശ്വസനീയമായ തെളിവുകളൊന്നും ഹാജരാക്കാന് പോലീസിന് കഴിഞ്ഞില്ല. താന് നിരപരാധിയാണെന്നും കള്ളക്കേസില് കുടുക്കിയതാണെന്നും തോമസ് കോടതിയില് പറഞ്ഞു. തുടര്ന്നാണ് മജിസ്ട്രേറ്റ് തോമസിനെ കുറ്റവിമുക്തനാക്കിയത്.