ന്യൂഡല്ഹി: ഇന്ത്യന് ക്രിക്കറ്റ് താരങ്ങളുടെ സുരക്ഷയില് ആശങ്കയുണ്ടെന്ന് കാണിച്ച് ഐസിസിക്ക് പരാതി നല്കി ബിസിസിഐ. ലോകകപ്പില് ഇന്ത്യ – ശ്രീലങ്ക മത്സരത്തിനിടെ കാശ്മീരിന് നീതിവേണമെന്ന ബാനറുമായി ആകാശത്ത് വിമാനം പറന്ന സംഭവത്തില് അന്താരാഷ്ട്ര ക്രിക്കറ്റ് കൗണ്സിലിന് (ഐസിസി) പരാതി നല്കി ബിസിസിഐ.
മത്സരം തുടങ്ങി നിമിഷങ്ങള്ക്കുള്ളിലാണ് ലീഡ്സിലെ ഹെഡിങ്ലി ക്രിക്കറ്റ് ഗ്രൗണ്ടിന് മുകളിലൂടെ വിമാനം പറന്നത്. ജസ്റ്റിസ് ഫോര് കാശ്മീര് എന്ന ബാനറുമായിട്ടായിരുന്നു ഈ ചെറുവിമാനം പറന്നുയര്ന്നത്. അത് കഴിഞ്ഞ് അര മണിക്കൂറിനുള്ളില് മറ്റൊരു വിമാനം കൂടി പറന്നു. ഇതിനൊപ്പം കാശ്മീരിനെ സ്വതന്ത്രമാക്കണമെന്ന ബാനറാണുണ്ടായിരുന്നത്.
ഇതിന് പിന്നാലെ ഐസിസി അതൃപ്തി രേഖപ്പെടുത്തി പത്രക്കുറിപ്പ് ഇറക്കിയിരുന്നു. തങ്ങള് ഇത്തരം കാര്യങ്ങളെ പിന്തുണക്കുന്നില്ലെന്നും ഇതുതടയുന്നതിനായി പോലീസുമായി ബന്ധപ്പെട്ടിട്ടുണ്ടെന്നും പത്രക്കുറിപ്പില് ഐസിസി വ്യക്തമാക്കിയിരുന്നു. നേരത്തെ പാകിസ്താനും അഫ്ഗാനിസ്ഥാനും തമ്മില് നടന്ന ലോകകപ്പ് മത്സരത്തിലും സമാന സംഭവമുണ്ടായിരുന്നു.