തിരുവനന്തപുരം : കേരള രാഷ്ട്രീയത്തിലേക്ക് ഉടനെയൊരു തിരിച്ചുവരവുണ്ടാവില്ലെന്ന് മിസോറാം ഗവര്ണര് പിഎസ് ശ്രീധരന് പിള്ള. ക്രൈസ്തവ സഭകളെക്കുറിച്ച് എഴുതിയ പുസ്തകത്തിന്റെ പ്രകാശന ചടങ്ങിന് തിരുവനന്തപുരത്ത് എത്തിയപ്പോഴാണ് അദ്ദേഹം ഈക്കാര്യം പറഞ്ഞത്.
ഗവര്ണര് പദവി കുട്ടിക്കളിയല്ലെന്നും അത് പെട്ടെന്ന് വലിച്ചെറിഞ്ഞ് കേരള രാഷ്ട്രീയത്തിലേക്ക് മടങ്ങിവരാനില്ലെന്നും അദ്ദേഹം വ്യക്തമാക്കി. ഗവര്ണറുടെ പോസ്റ്റ് ഏറ്റവും ഉയര്ന്ന ഭരണഘടനാ പദവികളിലൊന്നാണെന്നും ശ്രീധരന് പിള്ള പറഞ്ഞു.
അതിനെ കുട്ടിക്കളി പോലെ വലിച്ചെറിയാന് തയ്യാറാവില്ല. തന്റെ ഭാഗത്തുനിന്ന് അങ്ങനെയൊരു സമീപനം ഉണ്ടാകില്ല. തീരുമാനം എടുക്കേണ്ടത് തന്നെ നിയമിച്ചവരാണെന്നും അദ്ദേഹം പറഞ്ഞു. അതേസമയം കേരള രാഷ്ട്രീയത്തിലേക്ക് പെട്ടന്ന് തിരിച്ചുവരവ് ഉണ്ടാകും എന്ന വാര്ത്തകള് വന്നതിനാലാണ് കുട്ടിക്കളി എന്ന വാക്കുപയോഗിച്ചതെന്നും അല്ലാതെ മറ്റാരെയും ഉദ്ദേശിച്ചില്ല എന്നും ശ്രീഢരന് പിള്ള പറഞ്ഞു.
കുട്ടിക്കളി പ്രയോഗം കുമ്മനത്തേക്കുറിച്ചാണോ എന്ന ചോദ്യത്തോട് പ്രതികരിക്കുകയായിരുന്നു അദ്ദേഹം. കുമ്മനം രാജശേഖരന് മിസോറാം ഗവര്ണര് പദവി രാജിവെച്ചാണ് ലോക്സഭാ തിരഞ്ഞെടുപ്പില് മത്സരിച്ചത്. ആ ഒഴിവിലാണ് പി.എസ്. ശ്രീധരന് പിള്ള ഗവര്ണറായത്.
അഭിഭാഷക വൃത്തിയോടുള്ള എന്റെ താല്പര്യം കാരണം ഞാന് അത് ഉപേക്ഷിച്ചിട്ടില്ലെന്നും പകരം മരവിപ്പിക്കുകയായിരുന്നുവെന്നും നേരത്തെ ശ്രീധരന് പിള്ള പറഞ്ഞിരുന്നു. മിസോറാം ഗവര്ണറായതിന് പിന്നാലെ കാലാവധി പൂര്ത്തിയാക്കിയാല് അഭിഭാഷകവൃത്തിയില് തിരിച്ചു വരാമെന്നും ശ്രീധരന് പിള്ള വ്യക്തമാക്കി.