കൊച്ചി: ദുരന്തമുഖത്തു നിന്നും കരകയറി വന്ന മലയാളികളെ ചാനല് ചര്ച്ചയിലൂടെ അധിക്ഷേപിച്ച റിപ്പബ്ലിക് ടിവി എഡിറ്റര് ഇന്-ചീഫ് അര്ണബ് ഗോസ്വാമിക്ക് വക്കീല് നോട്ടീസ്. സിപിഎം നേതാവ് പി ശശിയാണ് അര്ണാബിനെതിരെ മാനനഷ്ടത്തിന് കേസ് കൊടുത്തത്.
മലയാളികളെ അപമാനിക്കാനും ജനങ്ങളെ വിഭജിച്ച് കലാപമുണ്ടാക്കാനുമാണ് അദ്ദേഹം ശ്രമിച്ചതെന്നും, അര്ണബ് മാപ്പു പറയണമെന്നും മാനനഷ്ടമായി പത്തു കോടി രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കണമെന്നുമാണ് വക്കീല് നോട്ടീസില് പറയുന്നത്.
എവിടെനിന്നോ പണംവാങ്ങി രാജ്യത്തെ അപമാനിക്കുന്ന പ്രത്യേക ഗ്രൂപ്പാണ് മലയാളികള് എന്നാണ് അര്ണാബ് വിളിച്ചു പറഞ്ഞത്. മാധ്യമപ്രവര്ത്തകന് എന്ന നിലയിലുളള വിമര്ശനമല്ല അദ്ദേഹം നടത്തിയതെന്നും നോട്ടീസില് പറയുന്നു. മലയാളിയെന്ന നിലയില് താനും അപമാനിക്കപ്പെട്ടു. ഈ സാഹചര്യത്തിലാണ് മാനനഷ്ടക്കേസ് നല്കാന് ഇടയായതെന്ന് ശശി പ്രതികരിച്ചു.
അപമാനകരമായ വാര്ത്ത സംപ്രേഷണം ചെയ്ത അതേ പ്രാധാന്യത്തോടെ അര്ണബ് മാപ്പപേക്ഷ നടത്തണമെന്നാണ് ഹര്ജിയിലെ ആവശ്യം. ഇല്ലങ്കില് നിയമനടപടികളുമായി മുന്നോട്ടുപോകുമെന്ന് പി ശശി പറഞ്ഞു. പീപ്പിള് ലോ ഫൗണ്ടേഷന് അധ്യക്ഷനെന്ന നിലയിലാണ് അദ്ദേഹം ഹര്ജി നല്കിയത്.