തിരുവനന്തപുരം: കേരളത്തില് പലയിടത്തും ഇന്ന് ശക്തമായ മഴയ്ക്ക് സാധ്യതയെന്ന് കാലാവസ്ഥ വകുപ്പിന്റെ മുന്നറിയിപ്പ്. എട്ട് ജില്ലകളില് യെല്ലോ അലേര്ട്ട് പ്രഖ്യാപിച്ചു. അറബിക്കടലിലെ പടിഞ്ഞാറന് കാറ്റിന്റെയും, കര്ണാടക തീരം മുതല് തെക്കന് ഗുജറാത്ത് തീരം വരെ നിലനില്ക്കുന്ന ന്യൂനമര്ദ്ദ പാത്തിയുടെയും സ്വാധീനത്താലാണ് കേരളത്തില് ശക്തമായ മഴ ലഭിക്കുന്നത്.
64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുമെന്നാണ് പ്രവചനം. ശക്തമായ മഴയുടെ സാഹചര്യത്തില് കാസര്ഗോഡ്, കണ്ണൂര്, വയനാട്, കോഴിക്കോട്, മലപ്പുറം, തൃശൂര്, ഇടുക്കി, എറണാകുളം ജില്ലകളിലാണ് യെല്ലോ അലേര്ട്ട് പ്രഖ്യപിച്ചത്.
തിങ്കളാഴ്ച എറണാകുളം, തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലാണ് യെല്ലോ അലേര്ട്ട് പ്രഖ്യാപിച്ചിട്ടുണ്ട്. ചൊവ്വാഴ്ച കൊല്ലം, പത്തനംതിട്ട, ആലപ്പുഴ, ഇടുക്കി, കോട്ടയം, എറണാകുളം, തൃശൂര്, മലപ്പുറം, വയനാട്, കോഴിക്കോട്, കണ്ണൂര്, കാസര്ഗോഡ് എന്നീ ജില്ലകളിലാണ് യെല്ലോ അലേര്ട്ട്.
ജൂണ് 29 വരെ കേരളത്തില് ഒറ്റപ്പെട്ടയിടങ്ങളില് ഇടിമിന്നലോട് കൂടിയ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. കേരള-കര്ണാടക-ലക്ഷദ്വീപ് തീരങ്ങളില് അടുത്ത ദിവസങ്ങളില് മത്സ്യബന്ധനത്തിന് വിലക്കുണ്ട്.