തിരുവനന്തപുരം: കേരളത്തില് ഒമിക്രോണ് കേസുകള് കൂടി വരുന്നു. ഈ സാഹചര്യത്തില് പുതുവര്ഷാഘോഷങ്ങള് കരുതലോടെ വേണമെന്ന് ആരോഗ്യ മന്ത്രി വീണ ജോര്ജ് മുന്നറിയിപ്പ് നല്കി. എല്ലാവരും കോവിഡ് മാനദണ്ഡങ്ങള് കര്ശനമായി പാലിക്കണമെന്ന് ആരോഗ്യമന്ത്രി അറിയിച്ചു.
സംസ്ഥാനത്ത് പുതുവര്ഷത്തോടനുബന്ധിച്ച് രാത്രി നിയന്ത്രണങ്ങള് ഏര്പ്പെടുത്തിയിട്ടുണ്ട്. ഇതുകൂടാതെ കടകള്, ഷോപ്പിംഗ് മാളുകള്, ഹോട്ടലുകള്, ആരാധനാലയങ്ങള് എന്നിവിടങ്ങളില് പോകുന്നവരും ജാഗ്രത പുലര്ത്തണമെന്നും മന്ത്രി വ്യക്തമാക്കി.
also read: 2879 പേര്ക്ക് രോഗമുക്തി, കേരളത്തില് ഇന്ന് 2423 പേര്ക്ക് കോവിഡ്
സംസ്ഥാനത്ത് ഇതുവരെ 63 പേര്ക്കാണ് ഒമിക്രോണ് സ്ഥിരീകരിച്ചത്. എറണാകുളം 25, തിരുവനന്തപുരം 18, പത്തനംതിട്ട 5, തൃശൂര് 5, ആലപ്പുഴ 4, കണ്ണൂര് 2, കൊല്ലം 1, കോട്ടയം 1, മലപ്പുറം 1, കോഴിക്കോട് 1 എന്നിങ്ങനെയാണ് ജില്ലകളില് ഒമിക്രോണ് സ്ഥിരീകരിച്ചത്.
ഹൈ റിസ്ക് രാജ്യങ്ങളില് നിന്നും വന്ന 30 പേര്ക്കും ലോ റിസ്ക് രാജ്യങ്ങളില് നിന്നും വന്ന 25 പേര്ക്കും ഒമൈക്രോണ് ബാധിച്ചു. 8 പേര്ക്കാണ് സമ്പര്ക്കത്തിലൂടെ രോഗം ബാധിച്ചത്. അതിനാല് തന്നെ അതീവ ജാഗ്രത പാലിക്കേണ്ടതാണ്. ഗുരുതരാവസ്ഥ കുറവാണെങ്കിലും ചുരുങ്ങിയ ദിവസങ്ങള് കൊണ്ട് വളരെ വേഗത്തില് പടര്ന്നു പിടിക്കുന്ന കോവിഡിന്റെ ജനിതക വകഭേദമാണ് ഒമിക്രോണ്.