തിരുവനന്തപുരം; കേരളത്തില് ഇന്നും ശക്തമായ മഴയ്ക്ക് സാധ്യതയെന്ന് കാലാവസ്ഥ വകുപ്പിന്റെ മുന്നറിയിപ്പ്. ഇന്ന് 11 ജില്ലകളില് യെല്ലോ അലര്ട്ട് പ്രഖ്യാപിച്ചു. കോഴിക്കോട്, കണ്ണൂര്, കാസര്കോട് ഒഴികെയുള്ള ജില്ലകളിലാണ് യെല്ലോ അലേര്ട്ട് പ്രഖ്യാപിച്ചത്.
അടുത്ത ദിവസങ്ങളിലും മഴ ശക്തമാകുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ വിലയിരുത്തല്. ശ്രീലങ്കന് തീരത്തെ ചക്രവാതച്ചുഴിയാണ് ഇപ്പോഴത്തെ മഴയ്ക്ക് കാരണം. ചക്രവാതച്ചുഴിയുടെ സ്വാധീനത്തില് കിഴക്കന് കാറ്റ് ശക്തമായതിനാല് കേരളത്തില് ഒറ്റപ്പെട്ട ശക്തമായ മഴ തുടരും.
തെക്കന് കേരളത്തിലാണ് കൂടുതല് മഴയ്ക്ക് സാധ്യത. തിങ്കളാഴ്ചയോടെ ആന്ഡമാന് കടലില് പുതിയ ന്യൂനമര്ദ്ദം രൂപപ്പെടും. പിന്നീട് ഇത് ഇന്ത്യന് തീരത്തേക്ക് നീങ്ങാനാണ് സാധ്യത. ശക്തമായ മഴ തുടരുന്ന സാഹചര്യത്തില് തിരുവനന്തപുരം ജില്ലയിലെ വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര് ഇന്ന് അവധി പ്രഖ്യാപിച്ചു. പ്രൊഫഷണല് കോളജുകള് ഉള്പ്പടെയുള്ള വിദ്യാഭ്യാസ സ്ഥാപനങ്ങള്ക്ക് അവധിയായിരിക്കും.