തിരുവനന്തപുരം: ബംഗാള് ഉള്ക്കടലില് തമിഴ്നാട് തീരത്തോട് ചേര്ന്ന് ചക്രവാതച്ചുഴി രൂപപ്പെട്ടതായി കേന്ദ്ര കാലാവസ്ഥ നിരീക്ഷണ കേന്ദ്രം. അതിനാല് സംസ്ഥാനത്ത് ഇന്ന് മുതല് വീണ്ടും മഴ കനക്കുമെന്ന് മുന്നറിയിപ്പ് നല്കി. ഇന്ന് ആറ് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
ചൊവാഴ്ച വരെ സംസ്ഥാനത്ത് വ്യാപക മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിലാണ് ഇന്ന് യെല്ലോ അലര്ട്ട് പ്രഖ്യാപിച്ചത്. ഇടിമിന്നല് മുന്നറിയിപ്പും നല്കിയിട്ടുണ്ട്.
ഒറ്റപ്പെട്ടയിടങ്ങളില് ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചിട്ടുള്ളത്. അതേസമയം, ന്യൂനമര്ദ്ദമായി ചുരുങ്ങി, ബംഗാള് ഉള്ക്കടലില് നിന്നും അറബിക്കടലിലേക്ക് എത്തിയ ഗുലാബ് അതിതീവ്ര ന്യൂനമര്ദ്ദമായി ശക്തിപ്രാപിച്ചു. വരും മണിക്കൂറുകളില് ഇത് ഷഹീന് ചുഴലിക്കാറ്റായി മാറും. എന്നാല് ഇന്ത്യയില് കാര്യമായ സ്വാധീനമുണ്ടാകില്ലെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ നിഗമനം.