തിരുവനന്തപുരം; ലോകത്തെങ്ങുമുളള മലയാളികള്ക്ക് സ്വാതന്ത്ര്യദിനാശംസ നേര്ന്ന് മുഖ്യമന്ത്രി പിണറായി വിജയന്. കാല വര്ഷക്കെടുതി അതിജീവിക്കാന് സംസ്ഥാനത്തെ ജനങ്ങള് ഒറ്റക്കെട്ടായി നിന്നു പ്രവര്ത്തിക്കുന്ന വേളയിലാണ് ഇത്തവണ സ്വാതന്ത്ര്യദിനം വന്നെത്തുന്നതെന്ന് മുഖ്യമന്ത്രി പറഞ്ഞു. സാഹോദര്യവും സ്നേഹവും കരുതലും പ്രകടിപ്പിച്ചുകൊണ്ടാണ് കേരളത്തിലെ ജനങ്ങള് സ്വാതന്ത്ര്യദിനം ആഘോഷിക്കുന്നത്.
ജനാധിപത്യത്തിലും മതനിരപേക്ഷതയിലുമുള്ള വിശ്വാസം ആവര്ത്തിച്ചുറപ്പിക്കാന് സ്വാതന്ത്ര്യദിനം അവസരമാകണമെന്നും രാജ്യത്തെ മുഖ്യമന്ത്രിമാര്ക്കും ഗവര്ണര്മാര്ക്കും കേരള മുഖ്യമന്ത്രി പിണറായി വിജയന് അയച്ച സ്വാതന്ത്ര്യദിന സന്ദേശത്തില് അറിയിച്ചു.
സ്വാതന്ത്ര്യസമര കാലഘട്ടത്തില് നമ്മുടെ നേതാക്കള് വിഭാവനം ചെയ്ത ലക്ഷ്യങ്ങള് സാക്ഷാത്കരിക്കാന് കഴിഞ്ഞുവോ എന്ന പരിശോധന സ്വാതന്ത്ര്യദിനം ആഘോഷിക്കുന്ന വേളയില് ഓരോരുത്തരും നടത്തണം. ജനാധിപത്യവും മതനിരപേക്ഷതയുമാണ് നമ്മുടെ രാഷ്ട്രത്തിന്റെ ശക്തിസ്രോതസ്സ്. മതനിരപേക്ഷത നിലനിന്നാലേ സ്വാതന്ത്ര്യവും ജനാധിപത്യവും നിലനില്ക്കൂ എന്ന ചിന്ത ജനങ്ങളിലാകെ ഉണര്ത്താന് സ്വാതന്ത്ര്യദിനാഘോഷം സഹായിക്കട്ടെ എന്നും അദ്ദേഹം പറഞ്ഞു.
വലിയ പ്രളയക്കെടുതിയുടെ പശ്ചാത്തലത്തിലാണ് ഇത്തവണ സ്വാതന്ത്ര്യദിനം വന്നെത്തുന്നത്. കേരളത്തിന്റെ ചരിത്രത്തില് ഇത്രയും വലിയ ദുരന്തമുണ്ടായിട്ടില്ല. കേന്ദ്ര-സംസ്ഥാന സര്ക്കാരുകളും ജനങ്ങളാകെയും ഒന്നിച്ചുനിന്നാണ് ഈ ദുരന്തത്തെ അതിജീവിക്കുന്നത്. നാം ഒന്നിച്ചു നിന്നാല് ഏതു കൊടിയ ദുരന്തവും നേരിടാന് കഴിയും എന്ന സന്ദേശമാണ് പ്രളയകാലത്തെ ജനങ്ങളുടെ കൂട്ടായ്മ നല്കുന്നത്.
മുഖ്യമന്ത്രിയുടെ ദുരിതാശ്വാസ നിധിയിലേക്ക് ഉദാരമതികള് കാര്യമായ തോതില് സഹായമെത്തിക്കുന്ന ഘട്ടമാണിത്. ഏതു തുകയും ചെറുതല്ല, വലുതുമല്ല. ഈ ബോധത്തോടെ എല്ലാവരും ആത്മാര്ത്ഥമായി ഈ രംഗത്ത് സഹായിക്കുകയും സഹകരിക്കുകയും ചെയ്യണം എന്ന് അഭ്യര്ത്ഥിക്കുന്നു. ഈ വിധത്തിലുളള ജീവകാരുണ്യ നടപടികളിലൂടെയാവട്ടെ ഇക്കൊല്ലത്തെ നമ്മുടെ സ്വാതന്ത്ര്യദിനാഘോഷം.