കൊല്ലം : ഭര്തൃവീട്ടിലെ പീഡനം സഹിക്കവയ്യാതെ കല്ലടയാറ്റില് ചാടി ജീവനൊടുക്കിയ 22 കാരി രേവതി കൃഷ്ണയുടെ കുടുംബത്തിന് രണ്ട് തവണ പിഴ ചുമത്തി പോലീസ്. ചിതാഭസ്മം നിമജ്ജനം ചെയ്യാന് പോയപ്പോഴും പീഡന കേസില് ഡി.വൈ.എസ്.പി ഓഫീസില് പരാതി പറയാന് പോയപ്പോഴും പൊലീസ് നിസാരകാര്യങ്ങള് പറഞ്ഞ് പിഴ ചുമത്തിയെന്നാണ് രേവതിയുടെ കുടുംബം പറയുന്നത്.
ജൂലായ് 29 നായിരുന്നു രേവതിയെ മരിച്ച നിലയില് കണ്ടെത്തിയത്. കിഴക്കേകല്ലട നിലമേല് ബൈജു ഭവനില് സൈജുവിന്റെ ഭാര്യ രേവതി കടപുഴ പാലത്തില് നിന്ന് കല്ലടയാറ്റിലേക്ക് ചാടിയാണ് ജീവനൊടുക്കിയത്. സ്ത്രീധനത്തെച്ചൊല്ലി തുടര്ച്ചയായി ഭര്തൃപിതാവും മാതാവും മാനസികമായി പീഡിപ്പിച്ചതായി യുവതി ബന്ധുക്കളോട് പറഞ്ഞിരുന്നു.
സംഭവത്തില് രേവതിയുടെ കുടുംബം പോലീസില് പരാതി നല്കിയിരുന്നു. എന്നാല് ഒരു അന്വേഷണ പുരോഗതിയും ഇല്ലെന്ന് കുടുംബം പറഞ്ഞിരുന്നു. ഇതോടെ വിഷയത്തില് ഡി.വൈ.എസ്.പിക്ക് നേരിട്ട് പരാതി നല്കാന് കുടുംബാംഗങ്ങള് പോകുമ്പോഴായിരുന്നു ആദ്യത്തെ പെറ്റി.
ഡ്രൈവര്ക്കൊപ്പം മുന്നിലുണ്ടായിരുന്ന ആള് സീറ്റ് ബെല്റ്റ് ധരിച്ചില്ല എന്ന് പറഞ്ഞായിരുന്നു പിഴ. യുവതി ചാടി മരിച്ച പാലത്തില് വച്ചു തന്നെയാണ് പെറ്റി എഴുതി നല്കിയതെന്നും ബന്ധുക്കള് പറഞ്ഞു. വാഹനത്തില് ആളുകളുടെ എണ്ണം കൂടിയെന്ന് പറഞ്ഞാണ് രണ്ടാമത്തെ പിഴ ചുമത്തിയത്. യുവതിയുടെ ചിതാഭസ്മവുമായി പോകുമ്പോഴായിരുന്നു കിഴക്കേ കല്ലട പൊലീസിന്റെ തന്നെ രണ്ടാമത്തെ പെറ്റിയെന്നും ബന്ധുക്കള് വ്യക്തമാക്കി. കിഴക്കേ കല്ലട പൊലീസിന്റെ ഭാഗത്ത് നിന്നുണ്ടായത് പ്രതികാര നടപടിയാണെന്നും ആക്ഷേപമുണ്ട്.