തിരുവനന്തപുരം : ഭര്തൃപീഡനത്തെക്കുറിച്ച് പരാതി പറഞ്ഞ യുവതിയോട് കയര്ത്ത് സംസാരിക്കുന്ന വനിതാ കമ്മീഷന് അധ്യക്ഷ എം.സി ജോസഫൈനിന്റെ വീഡിയോ വ്യാപകമായി പ്രചരിക്കുന്നു. സംഭവത്തില് എം.സി ജോസഫൈനെതിരെ സമൂഹ മാധ്യമങ്ങളില് പ്രതിഷേധം ശക്തമായിക്കൊണ്ടിരിക്കുകയാണ്.
ഗാര്ഹിക പീഡനം നേരിടുന്നവര്ക്ക് തത്സമയം പരാതി നല്കാനായി വാര്ത്താചാനല് നടത്തിയ പരിപാടിയിലാണ് ഭര്ത്താവ് ഉപദ്രവിക്കുന്നെന്ന് പറഞ്ഞ യുവതിയോട് വനിതാ കമ്മീഷന് അധ്യക്ഷ അപമര്യാദയായി പെരുമാറിയത്. യുവതി സംസാരിച്ച് തുടങ്ങിയത് മുതല് അസ്വസ്ഥതയോടെയും ദേഷ്യത്തോടെയുമാണ് എം.സി ജോസഫൈന് പെരുമാറിയത്.
2014-ലാണ് വിവാഹം കഴിഞ്ഞതെന്നും ഭര്ത്താവ് നിരന്തരം ഉപദ്രവിക്കുന്നതായും കൊച്ചിയില് നിന്ന് വിളിച്ച യുവതി പരാതി പറഞ്ഞു. കുട്ടികളില്ലെന്നും ഭര്ത്താവിനൊപ്പം അമ്മായിയമ്മയും ഉപദ്രവിക്കുന്നുവെന്ന് പറഞ്ഞപ്പോള് എന്ത് കൊണ്ട് പൊലീസില് പരാതിപ്പെട്ടില്ലെന്ന് എം.സി ജോസഫൈന് ചോദിച്ചു.
ആരെയും അറിയിച്ചില്ലെന്ന് പരാതിക്കാരി പറഞ്ഞപ്പോള്. ‘എന്നാല് പിന്നെ അനുഭവിച്ചോ’ എന്നായിരുന്നു എം.സി.ജോസഫൈന്റെ പ്രതികരണം. കൊടുത്ത സ്ത്രീധനം തിരിച്ചുകിട്ടാനും നഷ്ടപരിഹാരത്തിനും നല്ല വക്കീല് വഴി കുടുംബകോടതിയെ സമീപിക്കണമെന്ന് പിന്നീട് ജോസഫൈന് യുവതിയോട് പറഞ്ഞു.
വനിതാ കമ്മീഷനില് വേണേല് പരാതിപ്പെട്ടോ എന്നുമായിരുന്നു എം.സി.ജോസഫൈന്റെ പ്രതികരണം. വീഡിയോ വൈറലായി മാറിയിരിക്കുകയാണ്. ഇതോടെ രൂക്ഷവിമര്ശനമാണ് സോഷ്യല്മീഡിയയില് ഉയരുന്നത്.