കൊച്ചി: അപൂര്വ രോഗത്തിന്റെ പിടിയിലകപ്പെട്ട പിഞ്ചുകുഞ്ഞിന്റെ ജീവന് രക്ഷിക്കാനായി ചികിത്സയ്ക്ക് സഹായം തേടി പിതാവ് ഹൈക്കോടതിയില്. ഞരമ്പുകളെയും പേശികളെയും ബാധിക്കുന്ന സ്പൈനല് മസ്കുലര് അട്രോഫി എന്ന അപൂര്വ ജനിതക രോഗം ബാധിച്ച അഞ്ചുമാസം പ്രായമുള്ള കുഞ്ഞിന്റെ ചികിത്സയ്ക്ക് സഹായം തേടിയാണ് പിതാവ് കോടതിയെ സമീപിച്ചത്.
16 മുതല് 18 കോടി രൂപയാണ് ചികിത്സ ചെലവ്. കോഴിക്കോട് സ്വദേശി ആരിഫിന്റെ കുഞ്ഞാണ് അപൂര്വ രോഗത്തോട് പൊരുതുന്നത്. കോഴിക്കോട് മെഡിക്കല് കോളേജിലെ വെന്റിലേറ്ററിലാണ് കുഞ്ഞിപ്പോള്. ചികിത്സയുടെ ഭാഗമായി അമേരിക്കയില് നിന്നുള്ള ഒനസെമനജീന് എന്ന മരുന്ന് ഒരു ഡോസ് നല്കണം.
16 കോടി മുതല് 18 കോടി വരെയാണ് ഇതിന്റെ വില. സര്ക്കാരിന്റെ ഭാഗത്ത് നിന്ന് സാമ്പത്തിക സഹായം ലഭിക്കണം എന്നാണ് പിതാവ് ഹര്ജിയില് ആവശ്യപ്പെടുന്നത്. കുട്ടിയുടെ സ്ഥിതി വിശദീകരിച്ച് മെഡിക്കല് കോളേജ് അധികൃതര് കോടതിയില് റിപ്പോര്ട്ട് നല്കിയിരുന്നു.
ഇത് ജസ്റ്റിസ് ബെച്ചു കുര്യന് തോമസ് പരിശോധിച്ചു. തുടര്ന്ന് കോടതി ഇക്കാര്യത്തില് സര്ക്കാരിന്റെ വിശദീകരണം തേടിയിട്ടുണ്ട്. മരുന്നിന്റെ ഫലസിദ്ധി, വില, ചികിത്സാരീതി, ക്രൗഡ് ഫണ്ടിങ് സാധ്യത തുടങ്ങിയവ പരിഗണിച്ചായിരിക്കും തീരുമാനമെന്ന് കോടതി പറഞ്ഞു. ഇക്കാര്യങ്ങള് പരിശോധിച്ച് 28-നകം സത്യവാങ്മൂലം ഫയല്ചെയ്യാന് സര്ക്കാരിനോടും ആരോഗ്യവകുപ്പ് ഡയറക്ടറോടും കോടതി നിര്ദേശിച്ചിട്ടുണ്ട്.