തൃശൂര്: കോവിഡ് കാരണം ലോക്ക്ഡൗണ് നീണ്ടതോടെ ഡെന്നിസ് ജോസഫിന്റെയും ബെഫി ജീസന്റെയും വിവാഹ സ്വപ്നവും ഒരു വര്ഷത്തിനിപ്പുറത്തേക്ക് നീണ്ടു. ഒടുവില് യുഎസ് പൗരത്വമുള്ള തിരുവനന്തപുരം പൂഞ്ഞാര് സ്വദേശി മങ്ങാട്ട് ഡെന്നിസ് ജോസഫിന്റെ വിസ കാലാവധി അവസാനിക്കാറായതോടെ കോടതി വിധിയനുസരിച്ച് റജിസ്ട്രാര് ഓഫിസില് ഒപ്പിട്ട ശേഷം മാടക്കത്തറ ചിറയത്ത് മുറ്റിച്ചൂക്കാരന് വീട്ടില് ബെഫി ജീസഫിനെ ഡെന്നീസ് തന്റെ ജീവിതസഖിയാക്കി.
ഇരുവരുടെയും വിവാഹം കുട്ടനെല്ലൂര് സബ് റജിസ്ട്രാര് ഓഫിസില് വെച്ചാണ് കോടതി വിധിയനുസരിച്ചു നടത്തിയത്. കഴിഞ്ഞ വര്ഷം മെയില് നടത്താനിരുന്നതാണ് അമേരിക്കന് മലയാളിയായ ഡെന്നിസ് ജോസഫിന്റെയും തൃശൂര് സ്വദേശിനി ബെഫി ജീസന്റെയും വിവാഹം.
എന്നാല് ലോക്ക്ഡൗണ് കാരണം നീണ്ടു. ഡെന്നിസിന് അവധി ലഭിച്ചതനുസരിച്ച് ഈ വര്ഷം മെയ് 15ലേക്കാണ് വിവാഹം വീണ്ടും മാറ്റിയത്. എന്നാല് ഇത്തവണയും കോവിഡ് ലോക്ക്ഡൗണ് ഇരുവരുടേയും വിവാഹത്തില് വീണ്ടു വില്ലനായി എത്തി.
നാട്ടിലെത്തിയ ഡെന്നിസ് ലോക്ക്ഡൗണില് കുടുങ്ങി. ഇതിനിടെ യുഎസ് പൗരത്വമുള്ള ഡെന്നിസിന്റെ വിസാ കാലാവധി അവസാനിക്കാറാവുകയും ചെയ്തു. സ്പെഷല് മാര്യേജ് ആക്ട് പ്രകാരം വിവാഹം കഴിക്കണമെങ്കില് 30 ദിവസത്തെ നോട്ടിസ് വേണമെന്നതാണ് ഇവരെ കുഴക്കിയത്.
ഒടുവില് ക്രിസ്ത്യന് സിവില് മാര്യേജ് നിയമപ്രകാരം വിവാഹിതരാകാന് ഇവര് തീരുമാനിക്കുകയായിരുന്നു. പക്ഷേ, കുട്ടനെല്ലൂര് സബ് രജിസ്റ്റ്രാര് ഓഫിസ് പ്രവര്ത്തിക്കാത്തതിനാല് ഇതിനുള്ള സാധ്യത മങ്ങി.ലോക്ഡൗണ് ഇളവു വരുമ്പോള് ഓഫിസ് തുറക്കാന് കാത്തിരുന്നെങ്കിലും യുഎസിലേക്കു മടങ്ങേണ്ടതിനാല് വിവാഹം പ്രതിസന്ധിയിലായി.
ഇതിനെത്തുടര്ന്നാണു ഹൈക്കോടതിയെ സമീപിച്ചത്. വീസ കാലാവധി തീരുന്ന പ്രത്യേക സാഹചര്യം വിലയിരുത്തിയ കോടതി, റജിസ്ട്രാര് ഓഫിസിലെ നോട്ടിസ് ബോര്ഡില് വിവാഹ വിവരം മുന്കൂട്ടി പ്രദര്ശിപ്പിക്കണമെന്ന നടപടിക്രമം ഒഴിവാക്കി വിവാഹം നടത്താന് ഉത്തരവിടുകയായിരുന്നു.
കോടതി നിര്ദേശിച്ചതു പ്രകാരം സബ് ഡിവിഷനല് മജിസ്ട്രേട്ട് രാവിലെ10.30നു മുന്പായി കുട്ടനെല്ലൂര് സബ് രജിസ്റ്റ്രാര് ഓഫിസില് രേഖകളെല്ലാം എത്തിച്ചു. ഉച്ചയോടെ നടപടികളെല്ലാം പൂര്ത്തിയാക്കി വിവാഹം നടന്നു. വധൂഗൃഹത്തിലെ ചടങ്ങുകള്ക്ക് ശേഷം രാത്രി ഡെന്നീസ് വിമാനത്താവളത്തിലേക്ക്.
രേഖകള് എല്ലാം ശരിയായി കഴിഞ്ഞാല് വൈകാതെ ബെഫിയും അമേരിക്കയിലെത്തും. ഇപ്പോള് പുറത്തു വന്ന ഈ വിവാഹം മാത്രമല്ല, പലരും ലോക്ക് ഡൗണിന് മുന്നേ തന്നെ താലികെട്ടിയ ചരിത്രവും ഉണ്ട്.