തിരുവനന്തപുരം; ടൗട്ടെ ചുഴലിക്കാറ്റിനെ തുടര്ന്നുണ്ടായ മഴയിലും കാറ്റിലും കടലാക്രമണത്തിലും വന് നാശനഷ്ടങ്ങളാണ് കേരളത്തിലെ പലയിടങ്ങളിലും സംഭവിച്ചത്. ടൗട്ടേയ്ക്ക് പിന്നാലെ മറ്റൊരു ചുഴലിക്കാറ്റു കൂടി വരുന്നതായി മുന്നറിയിപ്പ് നല്കിയിരിക്കുകയാണ് കാലാവസ്ഥ നിരീക്ഷണ കേന്ദ്രം.
ബംഗാള് ഉള്ക്കടലില് രൂപം കൊള്ളുന്ന ന്യൂനമര്ദ്ദം ചുഴലിക്കാറ്റായി മാറുമെന്നാണ് മുന്നറിയിപ്പ്. തെക്കുകിഴക്കന് ബംഗാള് ഉള്ക്കടലില് നാളെയോടെയാണ് പുതിയ ന്യൂനമര്ദം രൂപപ്പെടുക. ഇതോടെ കേരളത്തില് മഴ ശക്തമാകും.
യാസ് ചുഴലിക്കാറ്റായി മാറുമെന്നും മെയ് 26നോ 27നോ ഒഡിഷ, ബംഗാള് തീരം തൊടുമെന്നുമാണ് കാലാവസ്ഥാ കേന്ദ്രത്തിന്റെ മുന്നറിയിപ്പ്.
ഇതിന്റെ ഫലമായി കേരളത്തില് കനത്ത മഴയ്ക്ക് സാധ്യതയുണ്ട്. മധ്യകേരളത്തിലായിരിക്കും കൂടുതല് മഴ കിട്ടുക. ചുഴലിക്കാറ്റ് മുന്നറിയിപ്പിനെ തുടര്ന്ന് ഇന്ത്യന് കോസ്റ്റ്ഗാര്ഡ് മുന്നൊരുക്കം തുടങ്ങി. ചുഴലിക്കാറ്റ് ബാധിത മേഖലയില് മത്സ്യബന്ധനം വിലക്കി.
ചുഴലിക്കാറ്റിനെ തുടര്ന്ന് ബംഗാള്, ഒഡിഷ, അസം, മേഘാലയ തുടങ്ങിയ സംസ്ഥാനങ്ങളില് മഴ ലഭിക്കും. അതിനിടെ കാലവര്ഷം ആന്ഡമാനില് എത്തി. അടുത്ത രണ്ടാഴ്ച കേരളത്തില് സാധാരണയില് കൂടുതല് മഴ ലഭിക്കാന് സാധ്യതയുണ്ട്. കാലവര്ഷ വരവിന്റെ സൂചനയാണിത്.