തൊടുപുഴ: മഴയുടെ ശക്തി കുറയാത്തതിനാല് സംസ്ഥാനത്ത് പ്രതിസന്ധി രൂക്ഷമാകുന്നു. കൂടുതല് ഷട്ടറുകള് തുറന്നിട്ടും അണകെട്ടിലെ ജലനിരപ്പ് ഉയരുകയാണ്. ഈ സാഹചര്യം കണക്കിലെടുത്ത് മൂന്നിരട്ടി വെള്ളം തുറന്നു വിടുമെന്ന് അധികൃതര് അറിയിച്ചു. തീരദേശത്തുള്ളവര്ക്ക് അതീവ ജാഗ്രതാ നിര്ദേശം നല്കുന്നുണ്ട്. നിലവില് 2401.34 അടിയാണു ജലനിരപ്പ്. പരമാവധി സംഭരണശേഷി 2403 അടിയാണ്. അര്ധരാത്രിക്ക് 2400.38 അടിയായിരുന്നു ഡാമിലെ ജലനിരപ്പ്. ജലനിരപ്പ് ഉയരുന്നതിനാലാണ് അണക്കെട്ടില്നിന്ന് കൂടുതല് ജലം ഒഴുക്കിക്കളയാന് തീരുമാനമെടുക്കുന്നതെന്ന് മന്ത്രി എംഎം മണിയും കലക്ടറും വ്യക്തമാക്കി. നിലവില് 2, 3, 4 ഷട്ടറുകളാണ് തുറന്നിരിക്കുന്നത്. 40 സെന്റി മീറ്ററാണ് ഷട്ടറുകള് തുറന്നിരിക്കുന്നത്.
സെക്കന്ഡില് ഒന്നേകാല് ലക്ഷം ലീറ്റര് (125 ക്യുമെക്സ്) വെള്ളമാണ് പുറത്തേക്കു വിടുന്നത്. അണക്കെട്ടിലേക്കുള്ള നീഴൊഴുക്കു തുടരുന്ന സാഹചര്യത്തില് കെഎസ്ഇബി ഇന്നലെത്തന്നെ അതീവ ജാഗ്രതാ നിര്ദേശം (റെഡ് അലര്ട്ട്) പുറപ്പടുവിച്ചിരുന്നു. സംഭരണശേഷിയുടെ 97.61 ശതമാനമാണ് ഇപ്പോള് അണക്കെട്ടിലുള്ളത്. ചെറുതോണി അണക്കെട്ടിന്റെ താഴെയുള്ളവരും പെരിയാറിന്റെ ഇരുകരകളിലുള്ളവരും അതീവ ജാഗ്രത പുലര്ത്തണമെന്നു നിര്ദേശമുണ്ട്. വ്യാഴാഴ്ച വൈകിട്ട് 4.30ന് ട്രയല് റണ് അവസാനിപ്പിക്കുമെന്ന് അറിയിച്ചിരുന്നു.
എന്നാല് നീരൊഴുക്കു തുടരുന്നതിനാല് രാത്രിയിലും ട്രയല് റണ് തുടര്ന്നു. ജലനിരപ്പ് 2399.04 അടിയിലെത്തിയപ്പോഴാണ് ഇന്നലെ ഉച്ചയ്ക്ക് 12.31 ന് ട്രയല് റണ് ആരംഭിച്ചത്. മൂന്നാമത്തെ ഷട്ടര് 50 സെന്റിമീറ്റര് ഉയര്ത്തി സെക്കന്ഡില് 50 ഘനമീറ്റര് ജലം വീതമാണ് ഒഴുക്കിവിട്ടത്. 2403 അടിയാണ് അണക്കെട്ടിന്റെ പരമാവധി സംഭരണശേഷി. 26 വര്ഷങ്ങള്ക്കുശേഷമാണ് ഇടുക്കി ചെറുതോണി അണക്കെട്ടിന്റെ ഷട്ടര് തുറന്നത്.