പാലക്കാട് : പാലക്കാട്ടെ ബിജെപി സ്ഥാനാര്ത്ഥി ഇ.ശ്രീധരനെ വോട്ടര്മാര് കാലു കഴുകി സ്വീകരിച്ച സംഭവം വലിയ ചര്ച്ചയായിരുന്നു. വോട്ടര്മാര് ഇ ശ്രീധരനെ കാലുകഴുകി സ്വീകരിച്ചതിനെ അനുകൂലിച്ച് രംഗത്തെത്തിയിരിക്കുകയാണ് ബിജെപി ദേശീയ ഉപാധ്യക്ഷന് എ പി അബ്ദുള്ളക്കുട്ടി.
കാല് കഴുകുന്നത് ചിലയിടങ്ങളിലെ ആചാരവും ശീലവും ആണെന്ന് അബ്ദുള്ളക്കുട്ടി പറഞ്ഞു. വിവാദമാക്കേണ്ട വിഷയമല്ല ഇതെന്നും അബ്ദുള്ളക്കുട്ടി വ്യക്തമാക്കി. വാര്ത്താ സമ്മേളനത്തിലാണ് അബ്ദുള്ളക്കുട്ടി ഇക്കാര്യം പറഞ്ഞത്. ”ഞങ്ങളുടെ കണ്ണൂരൊക്കെ പുതിയാപ്പിളമാര് വീട്ടിലേക്ക് വരുമ്പോള് അളിയന്മാര് കാല് കഴുകാന് വെള്ളമൊഴിച്ചു കൊടുക്കും.
അത് മലപ്പുറത്ത് ഉണ്ടോ എന്ന് എനിക്കറിഞ്ഞൂട. കാലു തൊട്ട് വന്ദിക്കലും ബഹുമാനിക്കലും എല്ലാം നമ്മുടെ ഒരു ആചാര രീതികളാണ്. ലോകം മുഴുവനും കെട്ടിപ്പിടിച്ചു കൊണ്ടിരുന്നവര്, ഷെയ്ക്ക് ഹാന്റ് കൊടുത്തിരുന്നവര് എല്ലാം കൊറോണ വന്നപ്പോള് നമസ്തേ പറയാന് തുടങ്ങിയില്ലേ.”- അബ്ദുള്ളക്കുട്ടി ചൂണ്ടിക്കാട്ടി.
അതുപോലെ നമുക്കിതിനെ അനുകൂലിക്കുകയും വിമര്ശിക്കുകയും ചെയ്യാം. വിവാദമാക്കേണ്ട വിഷയമല്ലെന്നും അബ്ദുള്ളക്കുട്ടി പറഞ്ഞു. ഇ.ശ്രീധരന് കാല് തൊട്ട് വന്ദിക്കാന് മാത്രം അര്ഹതയുള്ള മഹാപ്രതിഭയാണെന്നും അബ്ദുള്ളക്കുട്ടി പറഞ്ഞു.