പാലക്കാട്: അട്ടപ്പാടിയിലെ വനമേഖലയില് കഞ്ചാവ് വേട്ടയ്ക്ക് പോയ ആറംഗ വനപാലക സംഘത്തെ കാണാതായി. തിങ്കളാഴ്ചയാണ് ഗലസി-തുടുക്കി വനമേഖലയിലേക്ക് മുക്കാലി ഫോറസ്റ്റ് റേഞ്ച് ഓഫീസര് അഭിലാഷിന്റെ നേതൃത്വത്തിലുള്ള ആറംഗ സംഘം യാത്ര തിരിച്ചത്.
മേഖലയില് കനത്ത മഴ തുടരുന്നതിനാല് വരകാര് പുഴ കരകവിഞ്ഞൊഴുകുകയാണ്. ഇതേതുടര്ന്ന് ഇവര് വനത്തില് കുടുങ്ങിയിരിക്കാമെന്ന നിഗമനത്തിലാണ് വനംവകുപ്പ് അധികൃതര്.
കാണാതായ ആറംഗ സംഘത്തിന് വേണ്ടി മൂന്ന് സംഘങ്ങളായി തിരിഞ്ഞ് വനംവകുപ്പ് അന്വേഷണം തുടങ്ങിയിട്ടുണ്ട്. വയര്ലെസ് സംവിധാനങ്ങളും മൊബൈല് ഫോണുകളും ഉള്പ്പടെയുള്ള ആശയവിനിമയ സംവിധാനങ്ങള് ആറംഗ സംഘത്തിന്റെ കൈവശമുണ്ടെങ്കിലും ഇവരെ ബന്ധപ്പെടാന് സാധിച്ചിട്ടില്ല.
ഒരു ദിവസത്തെ ഭക്ഷണം മാത്രം ശേഖരിച്ചാണ് സാധാരണ കഞ്ചാവ് വേട്ടയ്ക്കായി ഉദ്യോഗസ്ഥര് കാടുകയറുന്നത്. അതിനാല് തിങ്കളാഴ്ച പോയ സംഘം ഇന്ന് രാവിലെയായിട്ടും തിരിച്ചെത്താത്തത് ആശങ്കയുണ്ടാക്കിയിട്ടുണ്ട്.
അഗളിയിലെ പോലീസ് സംഘം തിങ്കളാഴ്ച ആറംഗ സംഘത്തെ കണ്ടിരുന്നുവെന്ന് മനസിലായിട്ടുണ്ട്. ഇതാണ് സംഘത്തെ കുറിച്ചുള്ള അവസാന വിവരവും. മേഖലയില് കഞ്ചാവ് കൃഷി വ്യാപകമായതോടെ പോലീസും എക്സൈസും പരിശോധന കര്ശനമാക്കിയിരുന്നു. ഇതേതുടര്ന്നാണ് വനംവകുപ്പ് ഉള്ക്കാടുകളില് തെരച്ചിലിന് പോകാന് തുടങ്ങിയത്.