തിരുവനന്തപുരം: കല്ലമ്പലത്ത് കഴുത്തറുത്ത് മരിച്ച നിലയില് വീട്ടില് കണ്ടെത്തിയ ആതിരയുടെ ഭര്തൃ മാതാവിനെ തൂങ്ങി മരിച്ച നിലയില് കണ്ടെത്തിയിരുന്നു. തിരുവനന്തപുരം കല്ലമ്പലം സുനിതാ ഭവനില് ശ്യാമളയാണ് മരിച്ചത്. ഇന്ന് രാവിലെയാണ് ശ്യാമളയെ തൂങ്ങിമരിച്ച നിലയില് കണ്ടെത്തിയത്.
ഇന്ന് രാവിലെയാണ് വീടിന് തൊട്ടടുത്തുള്ള കോഴി ഫാമില് ശ്യാമളയെ തൂങ്ങി മരിച്ച നിലയില് കണ്ടത്. വിവാഹം കഴിഞ്ഞ് ഒന്നര മാസത്തിനുള്ളിലായിരുന്നു ആതിരയുടെ മരണം. ജനുവരി 15-നാണ് ശ്യാമളയുടെ മരുമകളായിരുന്ന ആതിരയെ കഴുത്തറുത്ത് മരിച്ച നിലയില് ബാത്ത്റൂമിനുള്ളില് കണ്ടെത്തിയത്.
ആതിര ആത്മഹത്യ ചെയ്യില്ലെന്ന് കുടുംബം പറഞ്ഞു. ഇതോടെ, പൊലീസ് അന്വേഷണം ഊര്ജ്ജിതമാക്കിയെങ്കിലും മരണത്തില് അസ്വഭാവികതയൊന്നും കണ്ടെത്താന് സാധിച്ചില്ല. അന്വേഷണം പുരോഗമിക്കുന്നതിനിടയിലാണ് ശ്യാമളയുടെ ആത്മഹത്യ.
അതേസമയം, ആതിരയുടെ മരണത്തില് ശ്യാമളയ്ക്ക് നേരെ പലരും സംശയമുന്നയിച്ചിരുന്നു. ശ്യാമള മകളോട് വഴക്കുണ്ടാക്കുമായിരുന്നുവെന്ന് ആതിരയുടെ അമ്മ മൊഴി നല്കിയിരുന്നു. ആതിര ഒരിക്കലും ആത്മഹത്യ ചെയ്യില്ലെന്നും പിന്നിലെ കാരണം കണ്ടെത്തണമെന്നും ഭര്തൃപിതാവും ആരോപിച്ചിരുന്നു.
കൂടാതെ, നാട്ടുകാരില് ചിലരും ഇവര്ക്കെര്ക്കെതിരെ മൊഴി നല്കിയിരുന്നു. ഒളിഞ്ഞും തെളിഞ്ഞും പലരും കൊലപാതകിയെന്ന് മുദ്രകുത്തിയെന്നും ഇതേത്തുടര്ന്നുണ്ടായ മാനസികസംഘര്ഷത്തെ തുടര്ന്നാണ് ശ്യാമള ആത്മഹത്യ ചെയ്തതെന്നുമാണ് ഇപ്പോള് പുറത്തുവരുന്ന സൂചനകള്.
ആതിരയുടെ മരണത്തില് 15-ലധികം പേരെ ഇതിനോടകം ചോദ്യം ചെയ്തിട്ടും കൊലപാതകത്തിലേക്കോ, ആത്മഹത്യയിലേക്കോ ബന്ധിപ്പിയ്ക്കാവുന്ന ഒന്നും ലഭിച്ചിരുന്നില്ല. ഒരേ വീട്ടില് സംഭവിച്ച രണ്ട മരണത്തിന്റെ നടുക്കത്തിലാണ് നാട്ടുകാര്.