തിരുവനന്തപുരം: നിയമസഭാ തിരഞ്ഞെടുപ്പില് ബിജെപി സ്ഥാനാര്ഥിയായി മത്സരിക്കാനുള്ള സാധ്യത തള്ളാതെ നടന് കൃഷ്ണകുമാര്. ബിജെപി അംഗത്വം എടുക്കാന് താന് തയ്യാറാണെന്ന് നടന് തുറന്നുപറഞ്ഞു. മാതൃഭൂമി ന്യൂസിനോടാണ് കൃഷ്ണകുമാര് ഇക്കാര്യം പറഞ്ഞത്.
തെരഞ്ഞെടുപ്പില് മത്സരിക്കണമെന്ന് തന്നോട് ബി.ജെ.പി നേതൃത്വം ഇതുവരെ ആവശ്യപ്പെട്ടിട്ടില്ല. പക്ഷേ പാര്ട്ടി അംഗത്വം എടുക്കാന് താന് തയ്യാറാണെന്നും കൃഷ്ണ കുമാര് പറഞ്ഞു. തെരഞ്ഞെടുപ്പില് ബി.ജെ.പിയുടെ പ്രചാരണത്തിന് ഇറങ്ങാന് 100 ശതമാനം തയ്യാറാണെന്നും താരം പറഞ്ഞു.
അറിയപ്പെടുന്ന ഒരു കലാകാരന് സ്ഥാനാര്ഥിയാകുമ്പോഴോ പ്രചരണത്തിന് ഇറങ്ങുമ്പോഴോ പത്ത് പേരില് കൂടുതല് സ്വാധീനമുണ്ടാക്കാന് കഴിയുമെന്നാണ് തന്റെ വിശ്വാസമെന്നും കൃഷ്ണ കുമാര് പറഞ്ഞു. മത്സരിക്കുന്ന സ്ഥാനാര്ഥികളുടെ കാര്യങ്ങള് പാര്ട്ടി നേതൃത്വം തീരുമാനിക്കും.
പാര്ട്ടി അംഗത്വം ഇന്നു തന്നാലും സന്തോഷത്തോടെ സ്വീകരിക്കും. ഇന്നുവരെ അതൊന്നും പാര്ട്ടിയോട് ചോദിച്ചിട്ടില്ല. അംഗത്വം ചെറിയൊരു കാര്യം മാത്രമാണ്. പാര്ട്ടി അംഗത്വമെടുക്കുമ്പോള് നേരെചൊവ്വെ എടുക്കണമെന്നാണ് തന്റെ ആഗ്രഹമെന്നും കൃഷ്ണകുമാര് പറഞ്ഞു.