ന്യൂഡല്ഹി: വയനാട്ടിലെ കര്ഷക ആത്മഹത്യയും കേരളത്തിലെ മൊറട്ടോറിയം കാലാവധി നീട്ടിനല്കാത്ത വിഷയവും ലോക്സഭയില് ഉന്നയിച്ച് വയനാട് എംപി രാഹുല്ഗാന്ധി. കാര്ഷിക കടങ്ങള്ക്കുള്ള മൊറട്ടോറിയം നീട്ടാന് കേന്ദ്രസര്ക്കാര് ബാങ്കുകള്ക്ക് നിര്ദേശം നല്കണമെന്ന് രാഹുല് ഗാന്ധി ലോക്സഭയില് ആവശ്യപ്പെട്ടു. വയനാട്ടിലെ കര്ഷക ആത്മഹത്യകളെപ്പറ്റി ലോക്സഭയില് സംസാരിക്കുന്നതിനിടെയാണ് കാര്ഷിക കടങ്ങള്ക്കുള്ള മൊറട്ടോറിയം നീട്ടണമെന്ന് രാഹുല് ആവശ്യപ്പെട്ടത്.
കഴിഞ്ഞദിവസം കടബാധ്യതയെ തുടര്ന്ന് വയനാട്ടില് ഒരു കര്ഷകന് ആത്മഹത്യ ചെയ്തിരുന്നു. വായ്പകള് തിരിച്ചടക്കാന് കഴിയാത്തതിനാല് വയനാട്ടില് മാത്രം എട്ടായിരത്തോളം കര്ഷകര്ക്കാണ് ബാങ്കുകള് നോട്ടീസ് നല്കിയിരിക്കുന്നത്. ബാങ്കുകള് അവരുടെ വസ്തുവകള് ജപ്തി ചെയ്യുകയാണ്. ഇതാണ് കര്ഷക ആത്മഹത്യകള് വര്ധിക്കാന് കാരണമെന്നും രാഹുല്ഗാന്ധി സഭയില് കൂട്ടിച്ചേര്ത്തു.
കാര്ഷിക വായ്പയുടെ മൊറട്ടോറിയം കാലാവധി നീട്ടിനല്കാന് കേന്ദ്രം റിസര്വ് ബാങ്കിനോട് ആവശ്യപ്പെടണമെന്നും ബാങ്കുകള് ജപ്തി നോട്ടീസ് നല്കി കര്ഷകരെ ഭീഷണിപ്പെടുത്തില്ലെന്ന് കേന്ദ്രം ഉറപ്പുവരുത്തണമെന്നും അദ്ദേഹം പറഞ്ഞു. ബജറ്റില് രാജ്യത്തെ കര്ഷകര്ക്ക് ആശ്വാസകരമാകുന്ന ഒന്നുമില്ലെന്നും രാജ്യത്തെ കര്ഷകര് ദുരിതത്തിലാണെന്നും രാഹുല്ഗാന്ധി ലോക്സഭയില് പറഞ്ഞു.