മലപ്പുറം: ‘അഭിമന്യു’ എന്ന പേരില് മലപ്പുറം പാലേമാട് കോളേജ് യൂണിയന് പുറത്തിറക്കിയ മാഗസിന് ക്യാമ്പസ് ഫ്രണ്ട് പ്രവര്ത്തകര് നടുറോഡില് കത്തിച്ച സംഭവം ചോദ്യം ചെയ്ത എസ്എഫ്ഐ പ്രവര്ത്തകരോട് ഭീഷണിമുഴക്കി എസ്ഡിപിഐ ക്യാമ്പസ് ഫ്രണ്ട് പ്രവര്ത്തകര്.
പ്രതികരിക്കാനാണ് ഭാവമെങ്കില് അടുത്ത അഭിമന്യുമാരായി നിങ്ങള് മാറുമെന്നായിരുന്നു എസ്ഡിപിഐയുടേയും ക്യാമ്പസ് ഫ്രണ്ടിന്റേയും പ്രവര്ത്തകരുടെ ഭീഷണി.
ഇന്നലെയാണ് ഞങ്ങള് മാഗസിന്റെ പ്രകാശനം നടത്തിയത്. അഭിമന്യു എന്നായിരുന്നു ഞങ്ങള് മാഗസിന് പേരിട്ടത്. ഇന്ന് രാവിലെ കുട്ടികള്ക്കെല്ലാവര്ക്കും അത് വിതരണം ചെയ്യുകയും ചെയ്തു. അതിന് ശേഷം ഇന്ന് രാവിലെ കോളേജില് എത്തിയ ക്യാമ്പസ് ഫ്രണ്ട് പ്രവര്ത്തകരും പിന്നെ പുറത്തുള്ള എസ്ഡിപിഐക്കാരും കോളേജിലേക്ക് കയറുന്ന വഴിയില് വെച്ച് മാഗസിന് പരസ്യമായി കത്തിക്കുകയായിരുന്നു.
ഇത് ചോദ്യം ചെയ്തപ്പോള് അടുത്ത അഭിമന്യുമാരായി നിങ്ങള് മാറും എന്ന രീതിയിലായിരുന്നു അവരുടെ പ്രതികരണ’മെന്ന് കോളേജ് യൂണിയന് ചെയര്മാന് ഷിബില് പറഞ്ഞു.
അഭിമന്യൂ എന്ന പേരില് മാഗസിന് ഇറക്കാന് പോകുന്നു എന്നറിഞ്ഞതു മുതല് അവര് പല രീതിയിലും പ്രശ്നങ്ങള് ഉണ്ടാക്കിയിരുന്നു. മാനേജുമെന്റുമായി ബന്ധപ്പെട്ട് പ്രശ്നങ്ങളെല്ലാം ഉണ്ടായിക്കിയെങ്കിലും അതിനെയെല്ലാം അതിജീവിച്ച് ഇന്നലെയാണ് മാഗസിന് പ്രകാശനം ചെയ്യാന് കഴിഞ്ഞത്. അതില് പ്രതിഷേധിച്ചാണ് അവര് മാഗസിന് കത്തിച്ചത്.
കോളേജിലെ ക്യാമ്പസ് ഫ്രണ്ടിന്റെ വിദ്യാര്ത്ഥികളും പുറത്തുനിന്നുള്ള എന്ഡിഎഫുകാരുമാണ് ഇതിന് പിന്നില് പ്രവര്ത്തിച്ചത്. കോളേജില് എട്ടോ പത്തോ പ്രവര്ത്തകരേ ക്യാമ്പസ് ഫ്രണ്ടിന്റേതായുള്ളൂ. പക്ഷേ ആ സാന്നിധ്യം അവര് ശക്തമായി തന്നെ അറിയിച്ചുകൊണ്ടിരിക്കുകയാണ്.
സംഭവത്തില് എടക്കര പോലീസ് സ്റ്റേഷനില് കേസ് ഫയല് ചെയ്തിട്ടുണ്ടെന്നും ഷിബില് പറഞ്ഞു. മാഗസിന് കത്തിച്ച സംഭവത്തിലും വധഭീഷണി മുഴക്കിയ സംഭവത്തിലുമാണ് പരാതി നല്കിയത്. കോളേജിലെ ക്യാമ്പസ് ഫ്രണ്ട് പ്രവര്ത്തകനായ തൗഫീഖാണ് മാഗസിന് കത്തിക്കുന്നതിന് നേതൃത്വം നല്കിയതെന്നും ഷിബില് പറഞ്ഞു. ക്യാമ്പസ് ഫ്രണ്ടിന്റെ നടപടിക്കെതിരെ കോളേജില് എസ്എഫ്ഐയുടെ നേതൃത്വത്തില് പ്രതിഷേധ പ്രകടനം നടത്തിയിട്ടുണ്ട്.