മലപ്പുറം: വടക്കന് കേരളത്തില് വെസ്റ്റ് നൈല് പനിക്കെതിരെ കനത്ത ജാഗ്രത. മലപ്പുറത്ത് വിദഗ്ധ സംഘത്തിന്റെ പരിശോധന തുടരുകയാണ്. മലപ്പുറം ജില്ലയില് വെസ്റ്റ് നൈല് പനി ബാധിച്ച ആറ് വയസുകാരന് മരിച്ചതിനു പിന്നാലെ കൊതുക് നിവാരണ പ്രവര്ത്തനങ്ങള് ആരോഗ്യവകുപ്പ് ഊര്ജിതമാക്കി.
വെസ്റ്റ് നൈല് പനിയെക്കുറിച്ച് സംസ്ഥാനത്ത് ആശങ്കപ്പെടേണ്ട സാഹചര്യമില്ലെന്ന് ആരോഗ്യമന്ത്രി കെകെ ശൈലജ അറിയിച്ചിരുന്നു. കോഴിക്കോട് മെഡിക്കല് കോളേജില് ചികിത്സയിലിരിക്കെയാണ് വെസ്റ്റ് നൈല് പനി ബാധിച്ച കുട്ടിയുടെ മരണം. ഇതിന് മുമ്പും വെസ്റ്റ് നൈല് കേരളത്തില് റിപ്പോര്ട്ട് ചെയ്തിട്ടുണ്ട്. മനുഷ്യരില് നിന്ന് മനുഷ്യരിലേക്ക് പകരില്ലെന്നും ആരോഗ്യവകുപ്പ് സജീവമായ ഇടപെടല് നടത്തുന്നുണ്ടെന്നും കെകെ ഷൈലജ പറഞ്ഞത്.
മലപ്പുറം വേങ്ങരയ്ക്ക് സമീപമുള്ള എആര് നഗര് സ്വദേശി മുഹമ്മദ് ഷാനാണ് ഇന്നലെ മരിച്ചത്. ഒരാഴ്ചയായി മെഡിക്കല് കോളേജില് തീവ്ര പരിചരണ വിഭാഗത്തില് ചികിത്സയിലായിരുന്നു. രണ്ടാഴ്ച മുമ്പാണ് മുഹമ്മദ് ഷാന് പനി ബാധിക്കുന്നത്. ആദ്യം കോട്ടക്കലിലെ സ്വകാര്യ ആശുപത്രിയിലും പിന്നീട് കോഴിക്കോട് മെഡിക്കല് കോളേജിലും എത്തിച്ചു. ഇവിടെവെച്ചാണ് രോഗം സ്ഥിരീകരിച്ചത്.
ഇതിന് പിന്നാലെ എആര് നഗറിലും കുട്ടിയുടെ അമ്മയുടെ വീടായ തിരൂരങ്ങാടിയിലും വിദഗ്ദ്ധ സംഘം പരിശോധനക്കെത്തിയിരുന്നു. പക്ഷികളുടേയും മൃഗങ്ങളുടേയും രക്ത സാമ്പിള് പരിശോധനക്കായി എടുത്തിട്ടുണ്ട്. രോഗം പടര്ന്നിട്ടില്ലെന്നാണ് പ്രാഥമിക നിഗമനം. മനുഷ്യരില് നിന്നും മനുഷ്യരിലേക്ക് പകരാത്ത രോഗമായതിനാല് ഭയപ്പെടേണ്ട സാഹചര്യമില്ലെന്നും ജാഗ്രതയാണ് വേണ്ടെതെന്നും ആരോഗ്യവകുപ്പ് അറിയിച്ചു.