തൃശൂര്: റോഡുകളില് വരഞ്ഞുപുളഞ്ഞ് കാണുന്ന സിഗ്സാഗ് ലൈനുകളുടെ പ്രത്യേകത വിവരിച്ച് കേരളാ പോലീസ്. ഇന്ത്യന് റോഡ് കോണ്ഗ്രസിന്റെ നിര്ദേശപ്രകാരം കാല്നടയാത്രക്കാരുടെ സുരക്ഷക്ക് വേണ്ടിയാണ് സിഗ്സാഗ് ലൈനുകള് റോഡുകളില് അടയാളപ്പെടുത്തുന്നതെന്ന് കേരളാ പോലീസ് വ്യക്തമാക്കി. സിഗ്സാഗ് വരകള് അടയാളപ്പെടുത്തുന്ന റോഡുകളില് ഡ്രൈവര്മാര് ഒരുകാരണവശാലും വാഹനങ്ങള് പാര്ക്ക് ചെയ്യാനോ നിര്ത്തുവാനോ, ഓവര്ടേക്ക് ചെയ്യാനോ പാടില്ലെന്ന് കേരളാ പോലീസ് ഫേയ്സ് ബുക്ക് പോസ്റ്റില് വ്യക്തമാക്കി.
കേരളാ പോലീസ് ഫേയ്സ് ബുക്ക്പോസ്റ്റ്;
നിരത്തുകളിലെ സിഗ് സാഗ് ലൈനുകള് എന്തിനാണ്? അടുത്തിടെ കേരളത്തിലെ ചില റോഡുകളില് കാണപ്പെട്ട വളഞ്ഞുപുളഞ്ഞ വരകളെക്കുറിച്ചു പലരും സംശയം ചോദിച്ചിരുന്നു.
റോഡുകളില് അടയാളപ്പെടുത്തുന്ന വരകള് വളഞ്ഞുപുളഞ്ഞ രീതിയില് (സിഗ് സാഗ് ലൈനുകള്) കണ്ടാല് പ്രത്യേകം ശ്രദ്ധിക്കുക. ഈ ഭാഗത്തു ഡ്രൈവര്മാര് ഒരുകാരണവശാലും വാഹനങ്ങള് പാര്ക്ക് ചെയ്യാനോ നിര്ത്തുവാനോ, ഓവര്ടേക്ക് ചെയ്യാനോ പാടില്ല. കാല്നടയാത്രക്കാരുടെ സുരക്ഷക്ക് വേണ്ടിയാണ് ഇത്തരം വരകള് രേഖപ്പെടുത്തുന്നത്. തിരക്കേറിയ കവലകളിലും പ്രധാനമായും സ്കൂളുകളുടെ മുന്നിലുമാണ് ഇത്തരത്തിലുള്ള വരകള് അടയാളപ്പെടുത്തുന്നത്. ഇവിടെ വാഹനങ്ങള്ക്ക് അനുവദിച്ചിട്ടുള്ള പരമാവധി വേഗം മണിക്കൂറില് 30 കിലോമീറ്ററാണ്. ഇത് പാലിക്കുന്നുണ്ടെന്ന് ഉറപ്പാക്കാന് സമീപത്ത് ക്യാമറകളുമുണ്ടാകും. ഇന്ത്യന് റോഡ് കോണ്ഗ്രസിന്റെ നിര്ദേശപ്രകാരമാണ് സിഗ് സാഗ് ലൈനുകള് വരയ്ക്കുന്നത്.