തിരുവനന്തപുരം: കേരള നിര്മ്മാണ തൊഴിലാളി ക്ഷേമനിധി ഫണ്ടിലേക്ക് തൊഴില് നൈപുണ്യ വകുപ്പ് ചുമത്തുന്ന കെട്ടിട സെസ് സംബന്ധിച്ച് നിരവധി പ്രചാരണങ്ങളാണ് സമൂഹമാധ്യമങ്ങള് വഴി ഉണ്ടാവുന്നത്. എന്നാല് ഇത്തരം പ്രചാരണം അടിസ്ഥാനരഹിതമെന്ന് ലേബര് കമ്മീഷണര് എ അലക്സാണ്ടര് പറഞ്ഞു.
2017ലെ നിര്മ്മാണതൊഴിലാളി ക്ഷേനിധി സെസ് നിയമത്തിലെ പുതുക്കിയ മാനദണ്ഡങ്ങള് പ്രകാരം 100 ചതുരശ്ര മീറ്റര് താഴെ വിസ്തീര്ണമുള്ള ഗാര്ഹിക കെട്ടിടങ്ങള്ക്ക് സെസ് നല്കേണ്ടതില്ല. 1995 നവംബര് മൂന്നിന് മുമ്പ് നിര്മ്മാണം പൂര്ത്തിയാക്കിയ കെട്ടിടങ്ങളെയും പത്ത് ലക്ഷത്തില് താഴെ നിര്മ്മാണ ചെലവുള്ള ഗാര്ഹിക കെട്ടിടങ്ങളെയും സെസില് നിന്നും ഒഴിവാക്കിയിട്ടുണ്ടെന്നും അദ്ദേഹം അറിയിച്ചു.
കേരള ബില്ഡിംഗ് ആന്റ് അദര് കണ്സ്ട്രക്ഷന് വര്ക്കേഴ്സ് വെല്ഫെയര് സെസ് ആക്ട് പ്രകാരം നിര്മ്മാണം പൂര്ത്തീകരിച്ച ഗാര്ഹിക വാണിജ്യ കെട്ടിടങ്ങള്ക്ക് ആകെ നിര്മ്മാണ ചെലവിന്റെ ഒന്നു മുതല് രണ്ടു ശതമാനം വരെ ഒറ്റത്തവണ കെട്ടിട സെസ് ഈടാക്കാമെന്നിരിക്കെ സംസ്ഥാനത്ത് ഒരു ശതമാനം മാത്രമാണ് സെസായി ഈടാക്കുന്നതെന്നും കമ്മീഷണര് പറഞ്ഞു.