സന്നിധാനം: കഴിഞ്ഞ ദിവസം ശബരിമല സന്നിധാനത്ത് നാമജപ പ്രതിഷേധം നടത്തിയവര്ക്കെതിരെ പോലീസ് കേസെടുത്തു. നിരോധനാജ്ഞ ലംഘിച്ചത് ഉള്പ്പെടെയുള്ള അഞ്ചുവകുപ്പുകള് ചുമത്തിയാണ് കേസ് രജിസ്റ്റര് ചെയ്തത്. നാമജപത്തിന് നേതൃത്വം നല്കിയ നാലുപേര് അടക്കം കണ്ടാലറിയാവുന്ന നൂറുപേര്ക്കെതിരെയാണ് പോലീസ് കേസെടുത്തിരിക്കുന്നത്.
വടക്കേനട ഭാഗത്തേക്ക് നാമജപവുമായി വ്യാഴാഴ്ച രാത്രി സന്നിധാനത്തെ ഒരുകൂട്ടം ഭക്തര് എത്തിയിരുന്നു. വടക്കേനടയില് പോലീസ് ഇവരെ തടയുകയും തുടര്ന്ന് പതിനഞ്ച് മിനിറ്റോളം വടക്കേനടയില് കൂടിനിന്ന് നാമം ജപിക്കുകയും ചെയ്തിരുന്നു. ഈ സംഭവത്തിലാണ് പോലീസ് പുതിയ കേസുകള് രജിസ്റ്റര് ചെയ്തിരിക്കുന്നത്.
ശബരിമലയിലും സന്നിധാനത്തും ഏര്പ്പെടുത്തിയ നിയന്ത്രണങ്ങളില് ഇളവുവരുത്തിയതോടെ ഭക്തരുടെ വരവില് നേരിയ വര്ധനവുണ്ടായിട്ടുണ്ട്. കഴിഞ്ഞദിവസം മുതലാണ് പോലീസ് നിയന്ത്രണങ്ങളില് ഇളവുവരുത്തിയത്.