തിരുവനന്തപുരം: നെയ്യാറ്റിന്കരയില് വാക്കു തര്ക്കത്തിനിടെ വാഹനമിടിച്ച് മരിച്ച സംഭവത്തില് സനല്കുമാര് കൊല്ലപ്പെട്ട സ്ഥലത്ത് മക്കളുമായി സമരം ചെയ്യുമെന്ന് സനലിന്റെ ഭാര്യ വിജി. സനല് കൊല്ലപ്പെട്ട സ്ഥലത്തുതന്നെ സമരം ചെയ്യും. അല്ലാതെ മറ്റൊരു വഴിയും ഞങ്ങളുടെ മുമ്പിലില്ല. നീതി കിട്ടുംവരെ സമരവുമായി മുന്നോട്ടുപോകുമെന്നും വിജി മാധ്യമങ്ങളോടു പറഞ്ഞു.
സനലിന്റെ കൊലപാതകത്തിനു പിന്നിലുള്ളവര്ക്കെതിരെ നടപടിയാവശ്യപ്പെട്ട് സെക്രട്ടറിയേറ്റിനു മുമ്പില് സമരം ചെയ്യുമെന്ന് സനലിന്റെ സഹോദരിയും പറഞ്ഞു. സനലിന്റെ മരണാനന്തര ചടങ്ങുകള് കഴിഞ്ഞാല് അമ്മയുള്പ്പെടെ സമരരംഗത്തേക്ക് വരുമെന്നും സഹോദരി പറഞ്ഞു.
കുടുംബാംഗങ്ങളെല്ലാം തന്നെ അടുത്ത ദിവസങ്ങളില് സെക്രട്ടറിയേറ്റിനു മുമ്പിലെത്തി സമരം ചെയ്യുമെന്നാണ് സഹോദരി പറഞ്ഞത്. ഡിവൈഎസ്പിയെ എന്ന് അറസ്റ്റു ചെയ്യുമോ അന്നുവരെ സമരം ചെയ്യാനാണ് തീരുമാനമെന്നും അവര് പറഞ്ഞു.
സനല്കുമാറിനെ കാറിനുമുന്നിലേക്ക് തള്ളിയിട്ട ഡിവൈഎസ്പി ബി ഹരികുമാറിനെതിരെ ഇതുവരെ പിടികൂടാന് പോലീസിന് കഴിഞ്ഞിട്ടില്ല. ഈ സാഹചര്യത്തിലാണ് നീതി ആവശ്യപ്പെട്ട് കുടുംബം തന്നെ സമരരംഗത്തേക്ക് ഇറങ്ങുന്നത്. അതിനിടെ ബി ഹരികുമാറിനെ ഉടന് അറസ്റ്റു ചെയ്യണമെന്നാവശ്യപ്പെട്ട് സനല്കുമാര് ആക്ഷന് കൗണ്സില് നെയ്യാറ്റിന്കര ഡിവൈഎസ്പി ഓഫീസിലേക്ക് മാര്ച്ചു നടത്തുന്നുണ്ട്.
നവംബര് അഞ്ചിനാണ് സനല്കുമാറിനെ ഡിവൈഎസ്പി ബി ഹരികുമാറിന് കാറിനുമുമ്പില് തള്ളിയിട്ട് കൊലപ്പെടുത്തിയത്.