തിരുവനന്തപുരം: താരസംഘടനയായ എഎംഎംഎ പ്രസിഡന്റും നടനുമായി മോഹന്ലാലിനെതിരെ വിമര്ശനവുമായി വനിതാ കമ്മീഷന് എംസി ജോസഫൈന്. എഎംഎംഎയുടെ നിലപാടിനെ വിമര്ശിച്ച് ഡബ്ല്യൂസിസി അംഗങ്ങള് രംഗത്ത് വന്നതിന്റെ പശ്ചാത്തലത്തിലാണ് മോഹന്ലാലിനെതിരെ ജോസഫൈന് രംഗത്തെത്തിയത്.
നേതൃത്വത്തിലേക്ക് മോഹന്ലാല് വന്നപ്പോള് ഒരു പ്രതീക്ഷ ഉണ്ടായിരുന്നെന്നും എന്നാല് അദ്ദേഹം നിരാശനാക്കിയെന്നും ജോസഫൈന് കൂട്ടിച്ചേര്ത്തു. ആ പ്രതീക്ഷ ഇപ്പോള് അസ്ഥാനത്തായെന്നും അവര് തുറന്നടിച്ചു. മോഹന്ലാല് അല്പ്പം കൂടി ഉത്തരവാദിത്തം കാണിക്കണം, ആരാധകരെ നിലയ്ക്ക് നിര്ത്തണം. നടിമാര്ക്കെതിരേ അവഹേളനം പാടില്ലെന്ന് മോഹന്ലാല് ഉള്പ്പെടെയുള്ളവര് പറയണം- ജോസഫൈന് പറഞ്ഞു.
നടി ആക്രമിക്കപ്പെട്ട സംഭവത്തില് എഎംഎംഎ പക്ഷപാതകരമായ നിലപാട് സ്വീകരിക്കുന്നുവെന്ന് ഡബ്ല്യൂസിസി കുറ്റപ്പെടുത്തി. ആക്രമണത്തെ അതിജീവിച്ച നടിക്കൊപ്പം നില്ക്കാതെ വേട്ടക്കാരനൊപ്പം നില്ക്കുന്ന സംഘടനയുടെ നിലപാടിനെ ഡബ്ല്യൂസിസി അംഗങ്ങള് ചോദ്യം ചെയ്തു. കോടതി വിധിക്കും വരെ ദിലീപ് നിരപരാധിയാണെന്നും ആക്രമിക്കപ്പെട്ട നടിക്ക് നീതി ലഭിക്കുകയാണ് തങ്ങളുടെ ലക്ഷ്യമെന്നും എഎംഎംഎ മറുപടി നല്കി.