തിരുവനന്തപുരം: അറബിക്കടലിന് തെക്കുകിഴക്കായി ശ്രീലങ്കയ്ക്കടുത്ത് പ്രത്യക്ഷപ്പെട്ട ന്യൂനമര്ദം ശക്തിപ്രാപിക്കുമെന്ന് റിപ്പോര്ട്ട്. ഇതിന്റെ അടിസ്ഥാനത്തില് സംസ്ഥാനത്ത് അതിശക്തമായ മഴയ്ക്കും കാറ്റിനും സാധ്യതയേറുകയാണ്. അതീവ ജാഗ്രതാ നിര്ദേശമാണ് സര്ക്കാര് നല്കുന്നത്. വ്യാഴാഴ്ചമുതല് ശനിയാഴ്ചവരെ പലയിടങ്ങളിലും അതിശക്തവും ഞായറാഴ്ച തീവ്രവുമായ മഴപെയ്യാന് സാധ്യതയുണ്ട്.
ഞായറാഴ്ച ഇടുക്കി, പാലക്കാട്, തൃശ്ശൂര് ജില്ലകളില് അതിജാഗ്രതാ മുന്നറിയിപ്പായ റെഡ് അലര്ട്ട് പ്രഖ്യാപിച്ചു. ഈ ജില്ലകളില് 24 മണിക്കൂറിനുള്ളില് 21 സെന്റീമീറ്ററില് കൂടുതല് മഴ പെയ്യാന് സാധ്യതയുണ്ട്. കേന്ദ്ര കാലാവസ്ഥാവകുപ്പ് മുന്നറിയിപ്പ് നല്കിയിട്ടുള്ളതിനാല് യുദ്ധകാലാടിസ്ഥാനത്തില് മുന്കരുതല് നടപടികള്ക്ക് കളക്ടര്മാരോട് നിര്ദേശിച്ചതായി മുഖ്യമന്ത്രി പിണറായി വിജയന് അറിയിച്ചു.
ന്യൂനമര്ദം ശക്തിപ്പെട്ട് ചുഴലിക്കാറ്റായി മാറുമെന്നും അറബിക്കടലിലൂടെ ലക്ഷദ്വീപിനടുത്തുകൂടി വടക്കുപടിഞ്ഞാറു ദിശയില് സഞ്ചരിക്കുമെന്നുമാണ് മുന്നറിയിപ്പ്. ന്യൂനമര്ദം ഞായറാഴ്ച ശക്തമാവും. തിങ്കളാഴ്ച കൂടുതല് ശക്തിപ്രാപിച്ച് ചുഴലിക്കാറ്റായി മാറും. ഇത് കേരളത്തെ നേരിട്ട് ബാധിക്കില്ല. ഇത് ഒമാന് തീരത്തേക്ക് നീങ്ങാനാണ് സാധ്യത. എന്നാല്, കേരള തീരത്ത് ശക്തമായ കാറ്റടിക്കും. വെള്ളിയാഴ്ചയോടെ കേരളത്തില് പരക്കെ അതിശക്തമായ മഴയ്ക്കും സാധ്യതയുണ്ട്. കേന്ദ്രസേനാ വിഭാഗങ്ങളോട് അടിയന്തരമായി സജ്ജമാകാന് ആവശ്യപ്പെട്ടു. എന്ഡിആര്എഫിന്റെ അഞ്ച് ടീമിനെ അധികമായി കേരളത്തിലേക്ക് അയക്കാന് ആവശ്യപ്പെടും.