കൊച്ചി: നടിയെ പീഡിപ്പിച്ച കേസില് ദിലീപിനെതിരെ വെളിപ്പെടുത്തലുകള് വന്നുകൊണ്ടിരിക്കുകയാണ്. ഇതിനിടെ അന്വേഷണ ഉദ്യോഗസ്ഥരെ വകവരുത്താനും സാക്ഷികളെ സ്വാധീനിക്കാനും ദിലീപും കൂട്ടാളികളും ശ്രമിച്ചതിന്റെ തെളിവായി 20 ഡിജിറ്റല് തെളിവുകള് അന്വേഷണ സംഘത്തിനു കൈമാറിയതായി സംവിധായകന് ബാലചന്ദ്രകുമാര് പറഞ്ഞു.
എറണാകുളം ക്രൈംബ്രാഞ്ച് ഓഫിസിലെത്തി മൊഴി നല്കിയ ശേഷം സംസാരിക്കുകയായിരുന്നു ബാലചന്ദ്രകുമാര്. 4 മണിക്കൂറോളം മൊഴിയെടുത്തു. കുറ്റകൃത്യത്തിന്റെ വിവരങ്ങള് ദിലീപിന്റെ സഹോദരന് അനൂപിനും കാവ്യ മാധവനും കൂടി അറിയാമെന്നാണു മൊഴി.
‘ശാസ്ത്രീയ പരിശോധനയിലൂടെ ഈ തെളിവുകളുടെ വിശ്വാസ്യത ബോധ്യപ്പെടും. ഓരോ ഡിജിറ്റല് തെളിവും സംഭവിച്ച തീയതിയും സമയവും അടക്കം ക്രോഡീകരിച്ചാണു കൈമാറിയത്.
മുഖ്യമന്ത്രിക്കു നല്കിയ പരാതിയില് പറയുന്ന കാര്യങ്ങളുടെ വിശ്വാസ്യത ശാസ്ത്രീയമായി തെളിയിക്കപ്പെടേണ്ടത് എന്റെ കൂടി ആവശ്യമാണ്. കുറ്റകൃത്യത്തെ കുറിച്ചു നേരിട്ട് അറിയാവുന്ന കാര്യങ്ങള് തുറന്നുപറഞ്ഞപ്പോള് മാനസിക സമ്മര്ദം ഇല്ലാതായി’- അദ്ദേഹം പറഞ്ഞു.