തന്നെ ബാധിച്ച ബെല്സ് പാള്സി എന്ന അസുഖത്തെ കുറിച്ച് വെളിപ്പെടുത്തി നടന് മനോജ് കുമാര്. തന്റെ യൂട്യൂബ് വീഡിയോയിലൂടെയാണ് അസുഖവിവരം മനോജ് പങ്കുവച്ചത്. അസുഖം ബാധിച്ച ശേഷം മുഖത്തിന്റെ ഇടതുഭാഗം കോടിപ്പോയെന്ന് മനോജ് പറയുന്നു.
ഈശ്വരന്റെ ഓരോ കുസൃതികളാണിത്. ദൈവം എന്റെയടുത്ത് ഒരു കുസൃതി കാണിച്ചതാണ്. അസുഖം വന്നാല് ആരും ഭയപ്പെടരുത്, മരുന്നെടുത്താല് വേഗം മാറും. താന് ഇപ്പോള് ഫിസിയോതെറാപ്പി തുടങ്ങിയെന്നും മനോജ് വീഡിയോയില് പറയുന്നു.
മനോജിന്റെ വാക്കുകള്
ഈ അസുഖത്തിന്റെ പേര് ബെല്സ് പാള്സി. ഇതേപറ്റി ഞാന് അറിയുന്നത് കഴിഞ്ഞ നവംബര് 28നാണ്. രാത്രി ഉറങ്ങാന് കിടക്കുമ്പോള് എന്തോ തോന്നി. രാവിലെ മാറുമെന്ന് കരുതി. പക്ഷേ മുഖം താല്ക്കാലികമായി കോടിപ്പോയി. തുപ്പിയപ്പോള് ഒരു സൈഡില് കൂടിയാണ് വായില് കൊണ്ട വെള്ളം പുറത്തേക്ക് പോയത്. പല്ല് തേക്കുന്നതിനിടയില് ഒരു അരിക് താഴ്ന്നിരിക്കുന്നു. ഒരു ഭാഗം എന്തോ വീക്കായതു പോലെ. മുഖത്തിന്റെ ഒരു ഭാഗം വര്ക്ക് ചെയ്യുന്നില്ലെന്ന് എനിക്ക് മനസിലായി.
ബീനയോട് പറഞ്ഞപ്പോള് എന്നെ ആശ്വസിപ്പിക്കുകയായിരുന്നു. ഡോക്ടര് കൂടിയായ എന്റെ അച്ഛന്റെ അനിയനെ വിളിച്ചു. വീഡിയോ കോളിലൂടെ അദ്ദേഹവുമായി സംസാരിച്ചു. എന്റെ പ്രശ്നങ്ങളെല്ലാം പറഞ്ഞു. ടെന്ഷനടിക്കേണ്ട, ബെല്സ് പാള്സിയാണെന്ന് അദ്ദേഹമാണ് പറഞ്ഞത്. ആശുപത്രിയിലെത്തുമ്പോള് എംആര്ഐ എടുത്തു നോക്കാന് പറഞ്ഞു. തലയില് വേറെ പ്രശ്നമൊന്നും ഇല്ലെന്നറിഞ്ഞു. ഇത്രയും കാലത്തിനിടയില് ആദ്യമായിട്ടാണ് ഇങ്ങെയൊക്കെ ചെയ്തത്. ബെല്സ് പള്സി തന്നെയായിരുന്നു. രണ്ടാഴ്ചത്തേക്ക് മെഡിസിന് തുടങ്ങി.
ഈ വീഡിയോ ഇടുന്നതിനോട് വീട്ടില് എതിര്പ്പുണ്ടായിരുന്നു. നമ്മളനുഭവിച്ച് പോകുന്ന ടെന്ഷനും കാര്യവും മറ്റുള്ളവര് കൂടി അറിയണം എന്നുള്ളതുകൊണ്ടാണിത്. ഇതു വന്നാല് ആരും ടെന്ഷനടിക്കേണ്ട, ഭയപ്പെടണ്ടേ ഇപ്പോള് ഓകെ ആയി തുടങ്ങി. ഫിസിയോ തെറാപ്പി ചെയ്യുന്നുണ്ട്. ഇതിനെക്കാള് ഭീകരമായിരുന്നു തുടക്കക്കാലത്ത്. ആസ്റ്ററിലും പോയി ഒരു ചെക്കപ്പ് നടത്തി. മറ്റ് പ്രശ്നങ്ങളൊന്നും ഇല്ലെന്നറിഞ്ഞു. എ സി ഡയറക്ട് ആയി നമ്മുടെ മുഖത്തടിക്കുക, ഫുള്ടൈം എ സിയില് ജോലി ചെയ്യുന്നവര്, അതൊക്കെ വളരെ അപകടകരമാണ്. അത് നിങ്ങള് ശ്രദ്ധിക്കണം. ആര്ക്കും വരാവുന്ന ഒരു രോഗമാണ്. വന്നാലും പേടിക്കരുത്.