പത്തനംതിട്ട: പ്രമുഖ ചലച്ചിത്ര നിര്മാതാവും പാചക വിദഗ്ധനുമായ നൗഷാദ് അന്തരിച്ചു. രോഗബാധയെ തുടര്ന്ന് ആശുപത്രിയില് ചികിത്സയിലായിരുന്നു അദ്ദേഹം. തിരുവല്ലയിലെ സ്വകാര്യ ആശുപത്രിയില് ചികിത്സയില് കഴിയവെയാണ് അന്ത്യം.
രണ്ടാഴ്ചമുമ്പായിരുന്നു നൗഷാദിന്റെ ഭാര്യ ഷീബ അന്തരിച്ചത്. ഒരു മകളാണ് ഇവര്ക്ക്. പ്രമുഖ കേറ്ററിങ്, റസ്റ്ററന്റ് ശൃംഖലയായ ‘നൗഷാദ് ദ് ബിഗ് ഷെഫി’ന്റെ ഉടമയാണ് നൗഷാദ്. തിരുവല്ലയില് റസ്റ്ററന്റും കേറ്ററിങ് സര്വീസും നടത്തിയിരുന്ന പിതാവില്നിന്നാണ് നൗഷാദിന് പാചക താല്പര്യം പകര്ന്നുകിട്ടിയത്.
കോളജ് വിദ്യാഭ്യാസത്തിനു ശേഷം ഹോട്ടല് മാനേജ്മെന്റ് പഠിച്ച നൗഷാദ് കേറ്ററിങ് ബിസിനസില് പുതിയ സാധ്യതകള് കണ്ടെത്തുകയും വികസിപ്പിക്കുകയും ചെയ്തു. നൗഷാദ് കേറ്ററിങ് വിദേശങ്ങളിലടക്കം പ്രശസ്തമായി. നൗഷാദ് ദ് ബിഗ് ഷെഫ് എന്ന റസ്റ്ററന്റ് ശൃംഖലയും പ്രശസ്തമാണ്.
ടെലിവിഷന് പാചക പരിപാടികളില് അവതാരകനായിട്ടുണ്ട്. സ്കൂളിലും കോളജിലും സഹപാഠിയായിരുന്ന സംവിധായകന് ബ്ലെസിയുടെ ആദ്യ ചിത്രമായ കാഴ്ച നിര്മിച്ചായിരുന്നു ചലച്ചിത്ര നിര്മാതാവെന്ന നിലയിലുള്ള തുടക്കം. പിന്നീട് ചട്ടമ്പിനാട്, ബെസ്റ്റ് ആക്ടര്, ലയണ്, പയ്യന്സ്, സ്പാനിഷ് മസാല തുടങ്ങിയ ചിത്രങ്ങളും നിര്മിച്ചു.