ചെന്നൈ: പ്രശസ്ത തമിഴ് നടന് വിവേക് അന്തരിച്ചു. ഇന്ന് രാവിലെ ചെന്നൈയിലെ സ്വകാര്യ ആശുപത്രിയില് വച്ചാണ് അന്ത്യം. ഹൃദയാഘാതം അനുഭവപ്പെട്ടതിനെത്തുടര്ന്ന് നടനെ ഇന്നലെ ആശുപത്രിയില് പ്രവേശിപ്പിച്ചിരുന്നു. തീവ്രപരിചരണവിഭാഗത്തില് ചികിത്സയില് കഴിയുകയായിരുന്നു അദ്ദേഹം.
59കാരനായ വിവേക് കഴിഞ്ഞ ദിവസം കോവിഡ് വാക്സിന് സ്വീകരിച്ചിരുന്നു. ഹൃദയാഘാതത്തെ തുടര്ന്ന് ആരോഗ്യനില മോശമായിരുന്നതിനാല് തീവ്രപരിചരണവിഭാഗത്തില് ചികിത്സയിലായിരുന്നു. കൊറോണറി ആന്ജിയോഗ്രാമും ആന്ജിയോപ്ലാസ്റ്റിയും നടത്തി.
അക്യൂട്ട് കൊറോണറി സിന്ഡ്രോമിനൊപ്പമുള്ള ഹൃദയാഘാതമാണ് വിവേകിന് സംഭവിച്ചതെന്ന് മെഡിക്കല് ബുള്ളറ്റിനില് ആശുപത്രി വൃത്തങ്ങള് അറിയിച്ചു. വിവേകിന്റെ വിയോഗം തമിഴ് സിനിമാലോകത്തിന് തീരാനഷ്ടമാണ്. മൂന്ന് തവണ തമിഴ്നാട് സര്ക്കാരിന്റെ മികച്ച ഹാസ്യനടനുള്ള പുരസ്കാരം നേടിയ നടനാണ് വിവേക്. സാമി, ശിവാജി, അന്യന് തുടങ്ങി നിരവധി സിനിമകളില് അഭിനയിച്ചിട്ടുണ്ട്.
ഹരീഷ് കല്യാണ് നായകനായ ധാരാള പ്രഭു ആണ് ഒടുവില് വേഷമിട്ട ചിത്രം. കമല്ഹാസന്റെ ഇന്ത്യ 2ലും നടന് അഭിനയിക്കുന്നുണ്ടെന്ന് വാര്ത്തകളുണ്ടായിരുന്നു