പൃഥ്വിരാജ് സുകുമാരന്റെ പുതിയ ചിത്രം പ്രഖ്യാപിച്ചു. സുപ്രിയ മേനോന് നിര്മ്മിക്കുന്ന ചിത്രത്തിന് ‘കുരുതി’ എന്നാണ് പേരി നല്കിയിരിക്കുന്നത്. പൃഥ്വിരാജ് തന്നെയാണ് ഇക്കാര്യം ഫേസ്ബുക്കിലൂടെ ആരാധകരെ അറിയിച്ചത്.
നവാഗതനായ മനു വാര്യര് സംവിധാനം ചെയ്യുന്ന ചിത്രം സാമൂഹിക-രാഷ്ട്രീയ ത്രില്ലറാകും എന്നാണ് ലഭിക്കുന്ന വിവരം. ‘കൊല്ലും എന്ന വാക്ക്. കാക്കും എന്ന പ്രതിജ്ഞ’ എന്നതാണ് സിനിമയുടെ ടാഗ് ലൈന്. ഡിസംബര് 9ന് ചിത്രത്തിന്റെ ഷൂട്ടിംഗ് ആരംഭിക്കും.
ഷൈന് ടോം ചാക്കോ, ശ്രിന്ദ, മുരളി ഗോപി, മാമുക്കോയ, റോഷന് മാത്യു, നവാസ് വള്ളിക്കുന്ന്, മണികണ്ഠന് ആചാരി, നസ്ലന്, സാഗര് സൂര്യ തുടങ്ങിയവരാണ് ചിത്രത്തിലെ മറ്റ് താരങ്ങള്. അഭിനന്ദന് രാമാനുജം ആണ് ചിത്രത്തിന്റെ ഛായാഗ്രഹണം നിര്വഹിക്കുന്നത്. റഫീഖ് അഹമ്മദ് ഗാനരചന ഒരുക്കുന്ന സിനിമയുടെ സംഗീതം ജേക്സ് ബിജോയ് ആണ്. അനിഷ് പള്ളിയാല് ആണ് കഥ ഒരുക്കുന്നത്.
അഖിലേഷ് മോഹന് എഡിറ്റിംഗും ഗോകുല് ദാസ് പ്രൊജക്റ്റ് ഡിസൈനും നിര്വഹിക്കുന്നു. ആനന്ദ് രാജേന്ദ്രന് ആണ് ചിത്രത്തിന്റെ പോസ്റ്റര് ഒരുക്കിയിരിക്കുന്നത്. കോസ്റ്റിയൂം ഇര്ഷാദ് ചെറുകുന്ന്, മേക്കപ് അമല്, ലൈന് പ്രൊഡ്യൂസര് ഹാരിസ് ദേസം, സ്റ്റില്സ് സിനാറ്റ് സേവ്യര്, സൗണ്ട് എഡിറ്റ് & ഡിസൈന് അരുണ് വര്മ, ഓഡിയോഗ്രഫി രാജകൃഷ്ണന്, പ്രൊമോഷന് പൊഫ്ഫാക്റ്റ്യോ.
”കോള്ഡ് കേസ്’ എന്ന ഇന്വെസ്റ്റിഗേഷന് ത്രില്ലര് സിനിമയിലാണ് പൃഥ്വിരാജ് ഇപ്പോള് അഭിനയിച്ചുകൊണ്ടിരിക്കുന്നത്. എസിപി സത്യജിത്തിന്റെ റോളിലാണ് പൃഥ്വിരാജ് ചിത്രത്തില് എത്തുന്നത്. തിരുവനന്തപുരത്ത് ആണ് പ്രധാന ലൊക്കേഷന്. അദിതി ബാലനാണ് ചിത്രത്തില് നായികയായി എത്തുന്നത്. തനു ബാലക് ആണ് ചിത്രം സംവിധാനം ചെയ്യുന്നത്.