കുവിവിളിച്ചും, തരംതാണും ഫാന്‍സ് അസോസിയേഷന്‍ ഗുണ്ടാസംഘങ്ങളായി മാറുന്ന കാലഘട്ടമാണ് ഇപ്പോഴുള്ളതെന്ന് നടന്‍ ഇന്ദ്രന്‍സ്. മലയാള ചലച്ചിത്ര ലോകം അടക്കിവാഴുന്ന താരരാജാക്കന്മാര്‍ ഇത്തരത്തിലുള്ള പ്രവര്‍ത്തികള്‍ കൂട്ടുനില്‍ക്കരുതെന്നും താരം കൂട്ടിച്ചേര്‍ത്തു. ഇത്തരം പ്രവണതകളെ പ്രോത്സാഹിപ്പിക്കരുതെന്നും അദ്ദേഹം അഭിപ്രായപ്പെട്ടു.
കഴിഞ്ഞ ദിവസം ഫാന്‍സ് അസോസിയേഷനുകള്‍ക്കെതിരെ സംസാരിച്ചതിന് സംവിധായകന്‍ ഡോക്ടര്‍ ബിജുവിനെതിരെയും നടിയും ചലച്ചിത്ര അക്കാദമിയംഗവുമായ സജിതാ മഠത്തിലിനെതിരെയും സൈബര്‍ ആക്രമണം നടന്നിരുന്നു. ഇതിനെതിരെ സാംസ്‌ക്കാരിക രംഗത്തെ 120 ഓളം പേര്‍ ഒപ്പിട്ട കത്ത് സര്‍ക്കാരിന് നല്‍കിയിരുന്നു. സൈബര്‍ ആക്രമണത്തെ തുടര്‍ന്ന് ഇരുവരുടെയും ഫേസ്ബുക്ക് പേജുകള്‍ ഡീ ആക്റ്റീവേറ്റ് ചെയ്യേണ്ടതായും വന്നിരുന്നു.
താര രാജാക്കന്മാരുടെ സ്വകാര്യ വെര്‍ച്വല്‍ പട്ടാളമാണ് അവരുടെ പേജില്‍ തെറി കൊണ്ടും അധിക്ഷേപങ്ങള്‍ കൊണ്ടും ഭീഷണി കൊണ്ടും അക്രമോത്സുകതയും ഭീതിയുടെ അന്തരീക്ഷവും നിറക്കുന്ന’തെന്നും കത്തില്‍ പറഞ്ഞിരുന്നു. നേരത്തെ ഫാന്‍സുകളുടെ പേരിലുള്ള ക്രിമിനല്‍ സംഘമുണ്ടെന്ന് സംവിധായകന്‍ ആഷിഖ് അബു അഭിപ്രായപ്പെട്ടിരുന്നു. ഇതിനു പിന്നാലെയാണ് അഭിപ്രായ പ്രകടനവുമായി ഇന്ദ്രന്‍സ് രംഗത്തെത്തിയത്.
