സുഡാനി ഫ്രം നൈജീരിയ എന്ന ഒറ്റ മലയാള ചിത്രത്തിലൂടെ മലയാളി മനസുകള് നേടിയ താരമാണ് സാമുവല് അബിയോള റോബിന്സണ്. സമൂഹമാധ്യമങ്ങളില് നിറഞ്ഞ ട്രോളിനോട് പ്രതികരിച്ച് രംഗത്തെത്തിയിരിക്കുകയാണ് താരം. മൃഗത്തോട് ഉപമിച്ചാണ് ട്രോള് ഇറക്കിയിരിക്കുന്നത്. ഇത് തന്റെ നിറത്തിന്റെ പേരില് നടത്തിയ അധിക്ഷേപമാണെന്ന് സാമുവല് പറയുന്നു. ചിത്രം ഉള്പ്പടെ ഫേസ്ബുക്കില് നല്കിയാണ് താരം പ്രതികരണം അറിയിച്ചത്.
‘ഒഫന്സീവ് മലയാളം മീമി’ എന്ന ട്രോള് പേജിലാണ് ചിത്രം പ്രത്യക്ഷപ്പെട്ടത്. ഫേസ്ബുക്കിലും ഇന്സ്റ്റഗ്രാമിലും പോസ്റ്റ് ചെയത ചിത്രം ഒരുപാട് പേര് ഷെയര് ചെയ്തിട്ടുണ്ട്. സുഡാനി ഫ്രം നൈജീരിയ സിനിമയില് കാലിന് പരുക്കേറ്റ സാമുവലിന്റേയും നായകന് സൗബിന് ഷാഹിറിന്റേയും ചിത്രത്തിന് മുകളില് ‘ഒരു മൃഗത്തേയും ചിത്രത്തിന്റെ ഷൂട്ടിങിനിടയില് അപായപ്പെടുത്തിയിട്ടില്ല. പക്ഷേ ഇതിനെ കുറിച്ച് മറന്നേക്കു’ എന്ന് എഴുതിയാണ് വംശീയാധിക്ഷേപമുള്ള ട്രോള് നിര്മിച്ചിരിക്കുന്നത്.
പല ആളുകളും സാമുവലിനെ ടാഗ് ചെയ്താണ് ചിത്രം ഷെയര് ചെയ്തിട്ടുള്ളത്. ‘ഞാന് അനുഭവിച്ചതില് ഏറ്റവും പൈശാചികമായുള്ള വംശീയാധിക്ഷേപമാണിത്. ഇവിടത്തെ ചില മനുഷ്യര് എന്നെ മൃഗത്തോട് താരതമ്യം ചെയ്യുന്നത് സങ്കടകരമാണെന്ന്” ട്രോളിന് പ്രതികരണമായി സാമുവല് കുറിച്ചു. ഇത് തമാശയായി കാണാനാവുന്നില്ല. വംശത്തിന്റേയും നിറത്തിന്റേയും പേരില് കളിയാക്കുന്നത് ശരിയല്ല. നല്ലൊരു ദിവസം ഇതുപോലെയുളള വംശീയ പോസ്റ്റ് കണ്ട് ആരംഭിക്കുന്നതിനെകുറിച്ചൊന്നു ആലോചിച്ച് നോക്കുവെന്ന് പറഞ്ഞാണ് സാമുവല് പോസ്റ്റ് അവസാനിപ്പിക്കുന്നത്.