ഷാര്ജ: എട്ടിലേറെ തവണ എയര്ഗണ് കൊണ്ട് വെടിയേറ്റിട്ടും ജീവിതത്തിലേക്ക് തിരിച്ചുകയറി ഒരു നായ. ഗ്രേസ് എന്ന പേരിട്ട നായ യൂറോപ്യന് ക്ലിനിക്കില് ചികിത്സയിലാണുള്ളത്. ഗുരുതരാവസ്ഥയിലായ നായ വിദഗ്ധ ചികിത്സയെ തുടര്ന്നാണ് ജീവിതത്തിലേക്കു മടങ്ങുന്നത്.
തലയിലും കണ്ണിനു സമീപത്തും ഉള്പ്പെടെ ആഴത്തിലേറ്റ വെടിയുണ്ടകളില് നിന്നു മൂന്നെണ്ണം മാത്രമാണ് ശസ്ത്രക്രിയ വഴി നീക്കം ചെയ്യാനായത്. ആരോഗ്യനില വിലയിരുത്തിയാകും തുടര് ശസ്ത്രക്രിയകള് നടത്തുകയെന്നു ഡോക്ടര്മാര് വ്യക്തമാക്കി.
also read: അതിമാരകം; എച്ച്ഐവി വൈറസിന്റെ പുതിയ വകഭേദം അതിവേഗം പടരുന്നുവെന്ന് ഗവേഷകര്, പഠനം
ചില വെടിയുണ്ടകള് നീക്കം ചെയ്യാനുള്ള ശസ്ത്രക്രിയ അതിസങ്കീര്ണമായതിനാല് ജീവഹാനിയോ ഗുരുതര ശാരീരിക പ്രശ്നങ്ങളോ ഉണ്ടാകാമെന്നാണ് നിഗമനം. നായയെ വെടിവച്ചവരെ കണ്ടെത്തി കടുത്ത നടപടികള് സ്വീകരിക്കുമെന്ന് അധികൃതര് വ്യക്തമാക്കി.
കഴിഞ്ഞമാസം 28ന് രാത്രി എമിറേറ്റിലെ താമസമേഖലയിലാണ് അറേബ്യന് സലൂകി ഇനത്തില്പ്പെട്ട നായയ്ക്ക് വെടിയേറ്റത്. 2 പേര് നായയെ വെടിവയ്ക്കുന്നത് കണ്ടതായി മേഖലയിലെ താമസക്കാരി അറിയിച്ചതിനെ തുടര്ന്ന് സന്നദ്ധ പ്രവര്ത്തകര് എത്തുകയായിരുന്നു.