ന്യൂഡല്ഹി: തീരദേശ പരിപാലന നിയമം ലംഘിച്ച് പണിത കൊച്ചി മരടിലെ അഞ്ച് ഫ്ളാറ്റ് സമുച്ചയങ്ങള് പൊളിച്ച് നീക്കാനുള്ള സമയപരിധി നീട്ടി നല്കില്ലെന്ന് സുപ്രീം കോടതി. പരിസ്ഥിതി നിയമം ലംഘിക്കുന്നവരോട് കോടതികളും മറ്റുസംവിധാനങ്ങളും ക്ഷമിക്കുന്ന പ്രവണത അവസാനിപ്പിക്കേണ്ട കാലം അതിക്രമിച്ചെന്നും സുപ്രീംകോടതി വിലയിരുത്തി.
തീരദേശ പരിപാലന നിയമം ലംഘിച്ച് നിര്മ്മിച്ച മരടിലെ ഹോളിഫെയ്ത്ത്, ആല്ഫ വെഞ്ചേഴ്സ്, ഗോള്ഡന് കായലോരം, ജെയ്ന് കോറല്കോവ്, ഹോളിഡെ ഹെറിറ്റേജ് എന്നീ ഫ്ളാറ്റ് സമുച്ചയങ്ങള് ഒരുമാസത്തിനകം പൊളിച്ചുനീക്കണമെന്ന് മെയ് എട്ടിനാണ് സുപ്രീംകോടതി ഉത്തരവിട്ടത്. എന്നാല് ബദല് സംവിധാനങ്ങള് ഒരുക്കുന്നതുവരെ മരടിലെ ഫ്ളാറ്റുകള് പൊളിച്ചുനീക്കുന്നതിനുള്ള സമയപരിധി നീട്ടി നല്കണമെന്ന് ആവശ്യപ്പെട്ട് ഫ്ളാറ്റ് ഉടമകള് ഹര്ജി നല്കുകയായിരുന്നു.
ഇത് പരിഗണിക്കവെയാണ് സുപ്രീംകോടതി ഇക്കാര്യം വ്യക്തമാക്കിയത്. ഫ്ളാറ്റ് ഉടമകള്ക്ക് നഷ്ടപരിഹാരം തേടി ഉചിതമായവേദികളെ സമീപിക്കാമെന്നും സുപ്രീംകോടതി അറിയിച്ചു. നേരത്തെ ഹൈക്കോടതിയില് നിന്ന് ഫ്ളാറ്റ് ഉടമകള്ക്ക് അനുകൂലമായ വിധി ലഭിച്ചിരുന്നെങ്കിലും ഇതിനെതിരെ തീരദേശ പരിപാലന അതോറിറ്റി സുപ്രീംകോടതിയെ സമീപിക്കുകയായിരുന്നു.